«Ես՝ համեստ անձս, մանիպուլյացիաների արվեստին վատ չեմ տիրապետում». Ռուբինյանը՝ ընդդիմությանը

«Մեծ իրադարձություն է տեղի ունեցել, տրվել է Հայաստան-Թուրքիա հարաբերությունների կարգավորման մեկնարկ, սակայն խորհրդարանում, բովանդակային քննարկումների փոխարեն, միայն մանիպուլյացիոն հարցադրումներ են հնչել».  Այս մասին այսօր՝ հունվարի 18-ին, ԱԺ-ում ասաց ԱԺ փոխնախագահ Ռուբեն Ռուբինյանը՝ պատասխանելով ընդդիմադիրների այն հարցերին, որոնք, ըստ իրեն, բովանդակային են:

Հարցին՝ իր հետ աշխատանքային խումբ եղել է, թե ոչ Ռուբինյանը պատասխանեց.

«Այո եղել է, կազմված դիվանագետներից և ԱԳՆ աշխատակիցներից։ Բանակցել եմ նաև համապատասխան մասնագետների հետ, ինչպես նաև՝ նախկինում բանակցողների հետ»,- ասաց փոխնախագահը:

Հարցին՝ որևէ փաստաթուղթ ստորագրելու լիազորություն ունի՞, Ռուբինյանն ասաց. 

«Ես չեմ այն սուբյեկտը, որը որ որոշում է կայացնում, սուբյեկտը կառավարությունն է, ես՝ ներկայացուցիչն եմ»,-ընդծեց Ռուբինյանը:

Նա նաև արձագանքեց իր՝ թուրքական ազդեցության գործակալ լինելու մասին խոսակցություններին.

«Ինձ համար մեր քաղաքական դաշտի կամ մեր պետության վերջին տասնամյակների գլխավոր խնդիրը քաղաքական երեսպաշտությունն է: Քաղաքական ուժերը, կախված կոնֆիգուրացիաներից, տարբեր քաղաքական դիրքորոշումներ են հայտնում և զգայուն թեմաները փորձում են կապիտալիզացնել»,-ասաց Ռուբինյանը և ընդդիմությանը մեղադրեց, որ իրեն մանիպուլյացիաների, սպեկուլյացիաների միջոցով փորձում են ներկայացնել կասկածելի կապերով անձ:

«Ինձ մոտ հարց է առաջանում՝ լավ, ինչպես կարող է մի խմբակցություն, որի անդամների մի մասը ՀՅԴ-ից է, որն, օրինակ, Ցեղասպանությունից առաջ համագործակցության փաստաթուղթ է ստորագրել երիտթուրքական ուժի հետ, մի ուժ, որը 1918 թվականին այցելել է Պոլիս ու ասել՝ Հայաստանն իր անկախութամբ պարտական է Թուրքիային, մի ուժ, որի ներկայացուցիչ Վրացյանը 1921 թվականին դիմել է Քեմալական Թուրքիային ռազմական աջակցության համար, մի ուժ, որը մեր օրերում սատարել է Ռոբերտ Քոչարյանին, որի օրոք ընթացել են գաղտնի բանակցություններ Հայաստանի ու Թուրքիայի միջև»,-եզրափակեց ԱԺ փոխնախագահը: