Անվստահության քվե՝ թիմակիցներին. ՔՊ-ականներից ո՞ւմ չի վստահում Փաշինյանը

Վերլուծական 5 Մարտ, 2022 21:02

Որևէ մեկի համար գաղտնիք չէ, որ հեղափոխությունից հետո վարչապետ Նիկոլ Փաշինյանն սկսել է որոշակի անվստահություն ցուցաբերել իր հետ «քայլած» հավատարիմ թիմակիցների նկատմամբ։ Մամուլը նույնիսկ գրում էր, որ Փաշինյանը սահմանափակել է շփումը ՔՊ-ականների հետ, յուրայինների հետ չատ է ստեղծել և այլն։ Իրականում, այդ անվստահությունը դժվար չէ նկատել, եթե մի փոքր ավելի ուշադիր դիտարկենք Փաշինյանի այս կամ այն ընդունած որոշումը։

Դիցուք` օրեր առաջ վարչապետի հրամանով Սյունիքի մարզպետ նշանակվեց Փաշինյանի խորհրդական կալավանցի Ռոբերտ Ղուկասյանը։ Մինչդեռ հիմնական վարչապետացուն նախկին փոխվարչապետ Տիգրան Ավինյանի մտերիմ, նրա կողմից լոբբինգ արվող կապանցի պատգամավոր Դավիթ Դանիելյանն էր։ Ըստ էության Փաշինյանը չվստահեց Ավինյանի կադրին, ասել է թե` Ավինյանին և նախընտրեց մարզպետ կարգել իր խորհրդականին։

Ամիսներ առաջ մամուլում գրվեց, որ ՔՊ նիստի ժանանակ փոխվարչապետի պաշտոնում էր ինքնաառաջադրվել առողջապահության նախկին նախարար Արսեն Թորոսյանը։ Փաշինյանը, սակայն, հասկացնել է տվել, որ Թորոսյանին այդ դիրքում չի վստահելու և մերժել է առաջադրումը։ Սա առաջին դեպքը չէ, երբ Փաշինյանն անվստահություն է ցուցաբերում Թորոսյանի հանդեպ։ Մինչ այդ էլ Արսեն Թորոսյանն իր սորոսական արբանյակների օգնությամբ փորձում էր վերադառնալ առողջապահության նախարարի պաշտոնին և կրկին ապարդյուն։

Փաշինյանը ակնհայտորեն չի վստահում նաև ՊՎԾ պետ նշանակված Ռոմանոս Պետրոսյանին։ Բանն այն է, որ օրեր առաջ հաշվեքննիչ պալատի նախագահ ընտրվեց ՔՊ կողմից առաջադրված Ատոմ Ջանջուղազյանը, ում գործառույթները կրկնում են Պետրոսյանի ՊՎԾ-ի գործառույթները։ Այսինքն Փաշինյանը ինքն իրեն Ատոմ Ջանջուղազյանով ստրախովկա է արել։

ՊԵԿ նախագահ Ռուստամ Բադասյանը նույնպես, կարծես թե, չի վայելում Փաշինյանի անվերապահ աջակցությունը։ Բանն այն է, որ Փաշինյանը բավական մեծ տեղ է տալիս ՊԵԿ փոխնախագահ և իր ընտանիքի մտերիմ համարվող Շուշան Ներսիսյանին` Նակոլկա Շուշոյին, ում միջոցով էլ փորձում է զրկել Բադասյանին մանեվրելու հնարավորություններից։

Ամիսներ առաջ ընդունվեց մի նախագիծ, որով պետական պահպանության ծառայությանը տրվեց վարչապետին ենթակա մարմնի կարգավիճակ՝ այն դուրս բերելով ԱԱԾ մարմինների համակարգից: Սա շատերը դիտարկեցին իբրև անվստահության քվե` ԱԱԾ-ին և ԱԱԾ պետ Արմեն Աբազյանին։

Փաշինյանի վստահությունը նվազել է նաև պատգամավոր Անդրանիկ Քոչարյանի հանդեպ։ Ամիսներ առաջ մամուլը գրել էր, որ Քոչարյանը ընդհուպ մինչև պալատական հեղաշրջման է պատրաստվում Փաշինյանի թիկունքում։ Տարածվող այդ լուրերի ֆոնին էլ հենց Փաշինյանը շտապեց ԳՇ պետի պաշտոնում Արտակ Դավթյանի նշանակումով Անդրանիկ Քոչարյանին հակակշռել, հատկապես, որ գիտենք, Արտակ Դավթյանի՝ բավական կոշտ վերաբերմունքը Քոչարյանի հանդեպ։ Բացի այդ, Փաշինյանը ՊՆ նախարար Սուրեն Պապիկյանի շուրթերով օրերս դեղին քարտ ցույց տվեց Քոչարյանին։ Հիշեցնենք, Պապիկյանը քննադատել և հետ էր ուղարկել զինված ուժերի բարեփոխման ռազմավարությունը, որի մշակման վրա աշխատում էր հենց Քոչարյանը։

Փաշինյանը չի վստահում նաև ՔՊ-ական պատգամավորներից Վարազդատ Կարապետյանին։ Վերջինիս փոխարեն 2020 թվականին հայ-իրանական բարեկամական խմբի նախագահ բոլորի համար նշանակվեց Մխիթար Հայրապետյանը, չնայած ի սկզբանե հենց ՔՊ-ականներն էլ հաստատում էին, որ տվյալ պաշտոնը Փաշինյանը խոստացել էր Վարազդատ Կարապետյանին։ Ընդհանրապես` նախորդ գումարման ԱԺ-ում ակտիվությամբ աչքի ընկնող պատգամավորն այս ԱԺ-ում անչափ լռակյաց է դարձել։

Իհարկե, Փաշինյանի կողմից վստահություն չվայելող ՔՊ-ականների թիվն անհամեմատ ավելի փոքր է, սակայն, անգամ այս օրինակները ի զորու են ապացուցել, որ ՔՊ-ում արշալույսներն այնքան էլ խաղաղ չեն, ինչպես հեղափոխությունից հետո ցանկանում է ներկայացնել Նիկոլ Փաշինյանը, և տարատեսակ թևերի միջև պայքարը անհետևանք չի մնում...