Տաթևիկ Ռևազյանն ու Գեղամ Գևորգյանը կրկին «ձեռքերը լվացել» են

Հայաստանի ավիատոմսերի շուկայում բավականին ուշագրավ իրավիճակ է ստեղծվել, մասնավորապես` մի շարք ուղղություններով, այն է Երևան-Մոսկվա չվերթի, տոմսերը կտրուկ թանկացել են վերջին օրերին: Իհարկե, քաղաքացիների ուշադրությունն էլ իր հերթին սևեռվել է քաղավիացիայի կոմիտեի և ՄՊՀ-ի վրա, քանի որ սրանք այն կառույցներն են, որոնք առնվազն պետք է բացատրեն հասարակությանը թե ինչով է պատճառաբանվում ավիաընկերությունների՝ քաղաքացիների գրպանը մտնելու այսչափ մեծ ցանկությունը:

Սակայն, բանից պարզվում է` տոմսերի գների հետ քաղավիացիան կապ չունի, այլ կերպ ասած՝ դա կոմիտեի լիազորություններից դուրս է։ Մնում է հասկանալ, թե ինչն է ընդհանրապես կոմիտեի լիազորությունների շրջանակներում, թերևս միայն հայկական ավիացիան վերացնելուն ուղղված աննկուն ջանքերը :

Իսկ մյուս կառույցը՝ ՄՊՀ-ն, իր հերթին չի շտապում հանրությանը բացատրություն տալ կամ ուսումնասիրություն սկսել: Մամուլի ներկայացուցիչներին կոմիտեից հայտնել էին, որ  մեկ տարի դրա համար օրենքով հասանելի ժամանակ ունեն:  Կոմիտեից բառացիորեն հետևյալն են ասում՝ ուսումնասիրությունները իրենց մոտ տևում է մոտ մեկ տարի, դա հենց օրենքով է սահմնաված, իսկ օտարերկրյա ավիափոխադրողները բնականաբար իրենց լիազորությունների շրջանակում են չեն:

Այսինքն` քաղաքացիները մոտ մեկ տարի պետք է սպասեն, մինչև կոմիտեն ուսումնասիրություն կատարի և գտնի մեղավորներին: Ընդամենը վերջերս նման իրավիճակ էր ստեղծվել, երբ Արմենիա ավիաընկերությունը կտրուկ բարձրացրել էր դեպի ՌԴ տոմսերի գները` հասցնելով 400 հազար դրամի:: Ընկերության բաժնետոմսերը պատկանում են ՀՀ քաղաքացի Աշոտ Թորոսյանին, սեփականատերից են նաև Վրաստանի քաղաքացի Ռոբերտ Օգանեսյանը և «Georgian Airways» ընկերության տնօրենների խորհրդի նախագահ Թամազ Գաիաշվիլին: Այն ժամանակ, իհարկե, ստուգումներ իրականացվեցին, սակայն, ասել որ արդյունք չարձանագրվեց, նշանակում է ոչինչ չասել:

Ըստ էության, այսօր էլ քաղավիացիայի կոմիտեն և ՄՊՀ-ն պարզապես թիթեռ են նկարում, մինչդեռ տուժում են հազարավոր մեր քաղաքացիները, ովքեր ստեղծված իրավիճակում կրկին միայնակ են մնացել իրենց խնդիրների հետ ...