Մակրոնը խոստացել է Ֆրանսիան ավելի անկախ դարձնել

Ֆրանսիայի նախագահ Էմանուել Մակրոնը, որը վերընտրվել է երկրորդ ժամկետով, իր երդմնակալությունից հետո իր առաջին ելույթում խոստացել է անխոնջ աշխատել՝ Ֆրանսիան ավելի անկախ պետություն դարձնելու և «մեր դարի մարտահրավերներին ֆրանսիական և եվրոպական պատասխան» ապահովելու համար, գրում է Ռիա Նովոստին։

Էմանուել Մակրոնը, ինչպես հայտնել ենք, այսօր՝ մայիսի 7֊ին, պաշտոնապես վերստանձնել է Ֆրանսիայի ղեկավարի պաշտոնը՝ հինգ տարի ժամկետով։ Երդմնակալության արարողությունը տեղի է ունեցել Ելիսեյան պալատում։ Արարողությանը հրավիրված էր մոտ 450 մարդ, որոնց թվում էին նախկին նախագահներ Ֆրանսուա Օլանդը և Նիկոլա Սարկոզին։ Հինգերորդ հանրապետության պատմության մեջ սա առաջին դեպքն է, երբ տոնակատարությանը ներկա էին պետության երկու նախկին ղեկավարները։ Հյուրերի թվում էին նաև գործող կառավարության անդամներ, ականավոր քաղաքական գործիչներ, խոշոր պետական ​​կառույցների ղեկավարներ, քաղաքապետեր, ֆրանսիացի Նոբելյան մրցանակակիրներ և այլք։

Մակրոնը շնորհակալություն է հայտնել իր նախորդներին՝ Օլանդին և Սարկոզիին, ովքեր մասնակցել են երդմնակալության արարողությանը։