Թուրքիայում արձագանքել են Իրանի ԱԳ նախարարի մեղադրանքներին

Իրանական կողմի հայտարարությունները Թուրքիայում ջրամբարների կառուցման եւ տարածաշրջանում ավազի ու փոշու փոթորիկների առաջացման փոխհարաբերությունների մասին հեռու են գիտական ​​հիմնավորումից։ Այս մասին հինգշաբթի օրը հայտարարել է Թուրքիայի արտգործնախարարության մամուլի քարտուղար Թանջու Բիլգիչը, փոխանցում է Anadolu-ն։

Նրա խոսքով` ավազային փոթորիկները բացասաբար են անդրադառնում թե՛ Թուրքիայի, թե՛ Իրանի վրա, և այդ բնական երևույթների առաջացման հիմնական գոտիները Աֆրիկայի և Մերձավոր Արևելքի երկրներն են։

Դիվանագետը ուշադրություն է հրավիրել ԶԼՄ-ներում և իրանցի քաղաքական գործիչների շրջանում Իսլամական Հանրապետության բնապահպանական իրավիճակի վատթարացման «թուրքական հետքի» թեմայի ակտիվ քննարկմանը։

Նա ընդգծել է, որ այս հարցում իրանական կողմի մեղադրանքները Թուրքիային զուրկ են գիտական ​​որեւէ հիմնավորումից։ Ավազի և փոշու փոթորիկների պատճառներն են հողի էրոզիան, անտառահատումները, երաշտը և կլիմայի փոփոխությունը, բացատրել է Բիլգիչը։

Նրա խոսքով՝ Անկարան ջրային ռեսուրսների օգտագործման ու կարգավորման թեմային վերաբերվում է զուտ մարդասիրական տեսանկյունից։

«Թուրքիան անդրսահմանային ջրային ռեսուրսները համարում է համագործակցության գործոն, ոչ թե հակասության։ Մեր երկիրը շարունակելու է հաշվի առնել հարևան պետությունների շահերը և գործել միջազգային իրավունքի շրջանակներում»,- վստահեցրել է Բիլգիչը։

Իրանի ԱԳ նախարար Հոսեյն Ամիր Աբդուլլահիանը, ավելի վաղ ելույթ ունենալով Իրանի խորհրդարանում, քննադատել էր Թուրքիայում ջրամբարների կառուցումը` դրանք անվանելով Իրանի՝ բնապահպանական ոլորտում խնդիրների պատճառներից մեկը։