Էրդողանը դեմ է Ֆինլանդիայի և Շվեդիայի՝ ՆԱՏՕ-ին անդամակցելուն

Թուրքիայի նախագահ Ռեջեփ Թայիփ Էրդողանը ուրբաթ օրը հայտարարել է, որ իր երկիրը, որը ՆԱՏՕ-ի անդամ է, չի կարող դրական գնահատել Շվեդիայի և Ֆինլանդիայի՝ դաշինքին միանալու ծրագրերը։

Այս մասին հայտնում է Daily Sabah-ը։

«Մենք դրա վերաբերյալ դրական կարծիք չունենք: Սկանդինավյան երկրները կարծես ահաբեկչական կազմակերպությունների հյուրատուն լինեն», - ասել է Էրդողանը` մատնանշելով, որ Թուրքիան կարող է օգտագործել Դաշինքի անդամի կարգավիճակը՝ վետո դնելու երկու երկրների անդամակցությանը: .

Միաժամանակ, Թուրքիայի նախագահը նկատի ուներ Քրդստանի աշխատավորական կուսակցության անդամներին, որոնք ապաստան են գտել սկանդինավյան երկրներում։

Էրդողանն ասել է, որ Թուրքիայի նախկին ղեկավարները «սխալվել են»՝ 1952 թվականին կանաչ լույս վառելով Հունաստանի` ՆԱՏՕ-ին անդամակցելու համար:

«Մենք՝ Թուրքիան, չենք ցանկանում երկրորդ սխալը թույլ տալ այս հարցում»,- ասել է նա։

Մայիսի 12-ին Ֆինլանդիայի նախագահ Սաուլի Նիինիստեն և վարչապետ Սաննա Մարինը պաշտոնապես հայտարարեցին, որ սատարում են երկրի անդամակցությանը ՆԱՏՕ-ին։

ՆԱՏՕ-ի գլխավոր քարտուղար Յենս Ստոլտենբերգն ասել է, որ Ֆինլանդիայի անդամակցությունը կուժեղացնի ինչպես դաշինքը, այնպես էլ բուն երկիրը:

«Եթե Ֆինլանդիան որոշի դիմել, ապա նրան ջերմորեն կընդունեն ՆԱՏՕ-ում, և անդամակցության գործընթացը կանցնի հարթ և արագ»,- ասել է Ստոլտենբերգը։

Շվեդիան ՆԱՏՕ-ին կարող է դիմել արդեն երկուշաբթի՝ մայիսի 16-ին, իշխող սոցիալ-դեմոկրատների որոշման հաջորդ օրը։