Չեմ հասկանում, վրաններո՞վ է պայմանավորված մեր շարժման ու պայքարի նպատակը․ Վարդևանյան

«Չեմ հասկանում, վրաններո՞վ է պայմանավորված մեր շարժման ու պայքարի նպատակը». Այս մասին այսօր՝ հունիսի 15-ին, Վարդանյանների այգում ինքնաբուխ բողոքի ակցիայի ժամանակ լրագրողների հետ զրույցում ասաց հավաքը գլխավորած «Հայաստան» դաշինքի պատգամավոր Արամ Վարդևանյանը:

«ԱԺ-ում մեզ տեսնելու եք՝ բացառապես մեր օրակարգով։ ՔՊ-ական օրակարգով, որը Հայաստանի առջև ծառացած խնդիրների, մարտահրավերների հետ առնչություն չունի, չեք տեսնելու: Հունիսի 3-ին տեսաք մեր կողմից բերված օրակարգ՝ հայ-թուրքական հարաբերություններ, Ադրբեջանի հետ կապված իրավիճակ, Արցախյան հակամարտության հետ կապված իրավիճակ, դուք տեսաք հստակ փաստաթուղթ, որի վերաբերյալ պետք էր հավաքվել ԱԺ-ում և ընդունել այդ հայտարարությունը։ Դուք տեսաք մեզ ԱԺ-ում, բայց չտեսաք ՔՊ-ին։ Ի դեպ, մեկ անձի եք տեսել, դա Ալենն էր Սիմոնյան, ով եկավ, գրանցվեց, նիստը բացեց, դրանից հետո ոչ մի պատգամավոր, որ այսօր խրոխտ խոսում են, չեկան»,- նշեց Վարդևանյանը։

Լրագրողի հարցին՝ ինչը ընդդիմությանը ստիպեց հավաքել վրանները և արդյոք ակնկալված ժողովրդական աջակցությունը չեն ստացել, Վարդևանյանը պատասխանեց.

«Անկեղծորեն չեմ հասկանում, թե ինչպես է շարժումը, պայքարը, դիմադրության ձևավորումը և դրա արդեն իսկ արտաքին աշխարհի հասու դառնալը պայմանավորվում վրաններով: Վրանը գործիքներից մեկն է, ինչպես օրինակ՝ բարձրախոսը և պիկապ մեքենան։ Օրինակ, եթե այսօր պիկապ մեքենան չլիներ, ասելու էին՞՝ պիկապը չկա, շարժման հետ կապված խնդիրներ կան»,- եզրափակեց ընդդիմադիր պատգամավորը՝ ընդծելով, որ սա գործիքներից մեկն է, ռազմավարությունը, իսկ օրակարգը որևէ կերպ չի փոխվել:

Մանրամասները՝ տեսանյութում: