«Քաղաքական պատվեր է կատարվելու». Գ. Մանուկյանը՝ Ապարանի աղմկահարույց դեպքի բացահայտման մասին

«Որևէ մեկն իրավունք չունի խառնվելու նախաքննությանը, պարզապես  կա հանրային պահանջ, որ ամբողջը պետք է քննվի, բացահայտվի՝  անկախ քաղաքական սահմանափակումներից, բայց այն  նշանները, որ հիմա կան Ապարանի դեպքի քննության հետ կապված, ցույց են տալիս, որ ուղղակի քաղաքական պատվեր է կատարվելու»,-այս մասին ԼՈՒՐԵՐ.com-ի հետ զրույցում նշեց ՀՀ ԱԺ «Հայաստան» խմբակցության պատգամավոր Գեղամ Մանուկյանը՝ անդրադառնալով երեկ Ապարանում տեղի ունեցած աղմկահարույց դեպքին:  

Նրա խոսքով՝ բառերով դժվար է նկարագրել այս խայտառակ դեպքը, անպատժելիությունը, ոստիկանության՝ գիշերվանից սկսած ՔՊ-ի մամուլի ծառայություն  դառնալը, ամեն ինչ փորձել կոծկելը և ԱԱԾ-ի պահվածքը:

«Երիտասարդներից մեկը ՀՀ ԱԱԾ ՍԶ աշխատակից էր. ԱԱԾ աշխատակիցները պետք է մի պահ կանգ առնեն  ու գիտակցեն, թե ուր են հասցրել երկիրն իրենց անգործությամբ, երբ զոհ են գնում նաև նրանց ծառայակիցները: Այսինքն՝ այն, ինչ տեսանք Ապարանում և  այն ձայնագրությունը,  որը  Հայաստանի Հանրապետության Բարձրագույն դատական խորհրդի նախագահ  Ռուբեն Վարդազարյանը հրապարակեց, փաստում են,  թե  ինչպիսի «բռնաբարող արդարադատություն» ունենք: Նման դեպքերի հանգուցալուծումը մեկն է՝  այս իշխանությանը վերջ դնելը»,-ասաց Մանուկյանը` հավելելով, որ այսօրվա հավաքը պետք է արտահայտի հանրային զայրույթը անարդարության նկատմամբ: 

Հիշեցնենք, որ այսօր` ժամը 19:00-ին, ընդդիմադիրները շտապ հավաք են անելու Ֆրանսիայի Հրապարակում․ նրանք շարժվելու են դեպի ՔՊ գրասենյակ, Ոստիկանության և ԱԱԾ շենքեր: