Ճոխ նվիրատվություններ՝ ՔՊ-ականներին. ովքեր են «երջանիկները»

Կառավարությունը նախորդ տարի փոփոխություն կատարեց պաշտոնատար անձանց գույքի և եկամտի  տարեկան հայտարարագրերում՝ հանրությանը հասանելի դարձնելով պաշտոնյաների ունեցվածքի վերաբերյալ  ավելի մանրամասն տվյալներ։ Մասնավորապես՝ պաշտոնատար անձինք այսուհետ պետք է նշեն իրենց նվիրատվություն կատարած անձի անուն-ազգանունը, անվանական հայտնեն, թե իրենց եկամուտները որտեղից են ձևավորվում, առանձնացված նշեն, թե որքան ֆինանսական միջոցներ ունեն՝ կանխիկ և բանկային հաշվին։ Այդ հայտարարագրերի ուսումնասիրությունից պարզ է դառնում, որ հեղափոխությունից հետո մի շարք պաշտոնյաներ բավական խոշոր նվիրատվություններ են ստացել, մինչդեռ 2018 թվականին Նիկոլ Փաշինյանը հայտարարում էր, որ նման երևույթը իբրև կոռուպցիայի դրսևորում պետք  է կառավարման համակարգից արմատախիլ անել: Չարվեց: Դիցուք՝ այն պաշտոնյաների ցանկը, ովքեր հեղափոխությունից հետո հաջողակ են գտնվել խոշոր նվերներ ստանալու հարցում:

ԿԲ նախագահ Մարտին Գալստյանը հայտարարագրել է 2,000,000.00 դրամի նվիրատվություն, որը ստացվել է 2020 թվականին:

Վարչապետի աշխատակազմի արդեն նախկին ղեկավար Էդուարդ Աղաջանյանը որպես նվիրատվություն է հայտարարգրել 800 հազար դրամը:

2020-ին Եղեգնուտ համայնքի ղեկավարի տեղակալի պաշտոնը ստանձնած Համլետ Մանուկյանը նվիրատվություն է ստացել միանգամից 5 ավտոմեքենա՝ OPEL,TOYOTA. MITSUBISHI, VOLKSWAGEN, PORSCHE:

Երևանի նախկին փոխքաղաքապետ Հայկ Սարգսյանը նվիրատվության կամ օգնության կարգով ստացված գույքը, դրամական միջոցները բաժնում նշել է 580 000 ռուսական ռուբլի եկամտի մասին:

Պատգամավոր, իմքայլական Աննա Կարապետյանի՝ նվիրատվության կամ օգնության կարգով ստացված գույքը, դրամական միջոցները՝ բացառությամբ աշխատանքի, ծառայության տեսքով ստացած, կազմել են 2,400 և 3,500 դոլար:

Արսեն Թորոսյանի նվիրատվության բաժնում լրացրած տողում գրված է, թե 2021 թվականին 9 միլիոն 520 հազար դրամ  է նվիրատվություն ստացել:

ՔՊ-ական պատգամավոր Տրդատ Սարգսյանը նվիրատվություն է ստացել հողամաս Վայոց ձորի մարզի Եղեգնաձոր քաղաքում։

Մալաթիա-Սեբաստիա վարչական շրջանի ղեկավար Սաշա Կատվալյանը հայտարարագրել է անհատական բնակելի տուն` հողամասի վրա կառուցված, իր տնտեսական շինություններով, որպես նվիրատվություն։

Տավուշի մարզպետ Հայկ Ղալումյանի կինը որպես նվիրատվություն է ստացել 1,760,550.00 դրամ, 370,000.00 և 160,000.00 ռուսական ռուբլի:

Ավելորդ է նշել, որ պաշտոնյայի կողմից նվիրատվություն ստանալը ինքնին կոռուպցիոն ռիսկ է պարունակում, քանի որ ինչպես կարելի է հասկանալ, տվյալ պաշտոնյան կարող է իր ունեցած լծակները ծառայեցնել տարբեր անձանց համար այս կամ այն խնդիրը լուծելու նպատակով, ինչի  դիմաց էլ պարգևատրվել ճոխ նվերներով: Սակայն, այս կոռուպցիոն ռիսկը, ինչպես և բազմաթիվ այլ կոռուպցիոն ռիսկ պարունակող տարրեր, օրվա իշխանությունների կողմից չնկատված են մնում...