Անկազմակերպ ռելոկացիա և Հայաստանի «անգին» նոր բրենդը. Սիսիան Պօղոսեանի «ձեռքբերումները»

Վեց ամիս առաջ ՀՀ Զբոսաշրջության կոմիտեի նախագահ նշանակվեց Սիսիան Պօղոսեանը: Նրա նշանակումը հանրությանը հրամցվեց իբրև նոր էջ Հայաստանի զբոսաշրջային քաղաքականության իրացման մեջ, բավական մեծ հույսեր էին կապվում Սփյուռքում աշխատած և բավական մեծ փորձ ունեցող անձի տպավորություն թողած Պողոսեանի հետ:

Սակայն վեց ամիս անց պետք է փաստենք, որ կոմիտեի անգործությունը չի կարող աչքի չզարնվել: Դիցուք՝ կոմիտեի ֆեսյբուքյան էջում տեղադրվում է նյութ, որում ռուս լրագրողը ներկայացնում է Հայաստանի բնության բարիքները և կիսվում  մեր երկրից ունեցած իր տպավորություններով: Ինչպես հասկանում ենք դա լրագրողի անձնական նախաձեռնությունն էր և այդ նյութի ստեղծման գործում կոմիտեն որևէ ներդրում չունի, սահմանափակվել են նյութը կիսվելով: Դրանից էլ գոհ լինենք:

Այնուհետև նույն ֆեյսբուքյան էջում հանդիպում ենք Ֆլայ Առնայի չվացուցակի, գնացուցակի մասին տեղեկությունների, թե ինչու է զբոսաշրջության կոմիտեն կիսվում այդ տեղեկությամբ նույնպես դժվար է ասել, չէ որ դրա համար կա ավիափոխադրողի կայքը և կոմիտեն չէ, որ պետք է զբաղվի ավիափոխադրողի փիառով:

Վեց ամսում կոմիտեն հասցրեց մշակել Հայաստանի զբոսաշրջային նոր բրենդը, որը, մեղմ ասած, չընդունվեց հասարակության կողմից, եղան բազմաթիվ սարկաստիկ, նույն ծաղրական մեկնաբանություններ: Ի դեպ հայտարարած մրցույթում էլ հաղթել է Aha collective խումբը։ Բանն այն է, որ այս ընկերությունը նորաբաց է, ֆեյսբուքյան էջն ունի 5 հավանում, իսկ ընկերության կայքը նոր-նոր է ձեւավորվում, եւ տարակուսանք է առաջանում, թե ինչպես է ստացվել, որ այս ընկերությունն է հաղթել։ Ավելին՝ ֆինանսավորող կազմակերպությունները նպատակահարմար չեն գտնում հանրայնացնել գումարի չափը, ինչը նույնպես հարցեր է առաջացնում:

Հասկանալի չէ, թե ինչ աղերս ունի Կոմիտեն նաև Econews Culture ամսագրում զետեղված Հայաստանի գինու ակունքները ներկայացնող նյութի հետ, նշված չէ, որ նյութը պատրաստվել  է կոմիտեի հետ համագործակցության արդյունքում և ստացվում է, որ կառույցը պարզապես նյութ է գտել ՀՀ մասին և կիսվում է դրանով:

Զբոսաշրջության կոմիտեն մի կողմից հայտարարում է Լոռիում զբոսաշրջության ոլորտի բիզնես ներկայացուցիչների, ՀԿ-ի հետ համատեղ իրականացված քննարկումների, մարզի զբոսաշրջային գրավչությանն ուղղված նախագծերի մասին, մյուս կողմից աչք է փակում այն փաստի վրա, որ նույն Լոռիում իշխանությունները ցանկանում են նոր հանքի կառուցման թույլտվություն տալ: Արդյո՞ք դա չի ազդելու մարզի զբոսաշրջային գրավչության վրա, անշուշտ ազդելու է:

Անհասկանալի է, թե ինչ է արել Կոմիտեն այս ընթացքում հայտնի իրադարձությունների ֆոնին Հայաստան տեղափոխված օտարերկրացիների ռելոկացիան կազմակերպելու համար: Վերջերս մամուլը գրել էր, որ Հայաստան ժամանած ռուսաստանցիների միայն փոքր մասն է որոշել մնալ այստեղ, իսկ սա նշանակում է, որ ռելոկացիոն ծրագրեր իրականացնողները ակնհայտորեն թերացել են իրենց աշխատանքում:

Ասել, որ կոմիտեն ընդհանրապես ոչինչ չի անում՝ իհարկե չենք կարող, որոշակի գործընթացներ տեսանելի են և միայն ուրախ կլինենք, եթե դրանք տան սպասված արդյունքը, սակայն արդյոք այն, ինչ այսօր արվում է բավական է՝ սահմանված նշաձողին հասնելու համար. թերևս՝ ոչ: