Չինաստանը խոստանում է Ուկրաինայում «կրակի վրա յուղ չլցնել»
Աշխարհ
Ապրիլի 1-ին հայտնի դարձավ, որ Եվրահանձնաժողովի ղեկավար Ուրսուլա ֆոն դեր Լեյենը ԵՄ-ՉԺՀ գագաթնաժողովում կոչ է արել Չինաստանին չաջակցել Մոսկվային՝ կապված Ուկրաինայում ռազմական հատուկ գործողության պատճառով Ռուսաստանի դեմ սահմանված պատժամիջոցների հետ։
«Իհարկե մենք ակնկալում ենք, որ Չինաստանը եթե չսատարի պատժամիջոցներին, ապա գոնե կանի հնարավոր ամեն բան՝ չմիջամտելու դրանց»,- ասել է ֆոն դեր Լեյենը։
Նա նաև վստահ է, որ Չինաստանը կարող է ազդել Ռուսաստանի վրա և վերադարձնել նրան բանակցությունների սեղանի շուրջ։
Եվրոպական խորհրդի նախագահ Շառլ Միշելն իր հերթին հիշեցրել է ԵՄ-ի և Չինաստանի միջև առևտրային հարաբերությունների կարևորությունը։
«Մենք հուսով ենք, որ Չինաստանը լսել է մեր ներկայացրած փաստարկները։ Մենք նաև հուսով ենք, որ Չինաստանը կմտածի համաշխարհային ասպարեզում իր հեղինակության մասին և հաշվի կառնի ԵՄ-ի հետ իր առևտրային հարաբերությունների կարևորությունը»,- հորդորել է Միշելը։
«Եվրամիությունը և Չինաստանը համաձայնել են, որ Ուկրաինայում ռազմական գործողությունները սպառնում են միջազգային անվտանգությանը և համաշխարհային տնտեսությանը»,֊ասել է նա։
«Չինաստանը և ԵՄ-ն, որպես երկու կարևոր համաշխարհային տերություններ, խոշոր շուկաներ և խոշոր քաղաքակրթություններ, պետք է ամրապնդեն համագործակցությունը չին-եվրոպական հարաբերությունների և համաշխարհային խաղաղության ու զարգացման հետ կապված հիմնական խնդիրների շուրջ, կառուցողական դեր խաղան և կայունության գործոն ապահովեն անկայունների համար»,- նրանց պատասխանել է Չինաստանի նախագահ Սի Ցզինպինը։ Նա հավելել է, որ աշխարհը պետք է աջակցի Ռուսաստանի Դաշնության և Ուկրաինայի միջև երկխոսությանը, այլ ոչ թե «կրակի վրա յուղ լցնի»։
Ամենադիտված 
Ջուր չի լինի նոյեմբերի՝ 25, 26 և 27-ին տասնյակ հասցեներում
