Կարմիր գիրք անցնող մասնագիտություններից մինչև բուհերի օպտիմալացում

Ամփոփելով  այս տարվա ընդունելության քննությունների արդյունքները՝ պետք է արձանագրել, որ դիմորդների քանակի առումով դրանք  առանձնապես չեն տարբերվում նախորդ տարիներից : Ինչպես ԼՈՒՐԵՐ.com-ի հետ զրույցում նշեց  կրթության  փորձագետ Սերոբ Խաչատրյանը,  ընդհանուր առմամբ, վերջին տարիներին դիմորդների թիվը նվազել է: Եթե նախկինում՝ 6-7 տարի առաջ,  կար 19-20 հազար դիմորդ, ապա վերջին մի քանի տարիներին դիմորդների թիվը չի գերազանցում 12-13 հազարը: 

«Արդեն հնացել է այն տեսակետը, թե դպրոցների շրջանավարտների մեծ մասը բուհ է  ընդունվում: Այժմ բուհ է ընդունվում նրանց 30 տոկոսը»,-նշեց նա:  

Խոսելով պատճառների մասին՝ ասաց, որ  դրանք տարբեր են:

«Հիմնական պատճառը   հանրակրթության տարիներին  առկա ցածր առաջադիմությունն է՝ տարրական գրագիտություն չունենալը,  երկրորդ պատճառը` ֆինանսական հնարավորությունների պակասը, իսկ երրորդ պատճառը բարձրագույն կրթության  արժեզրկումն է»,-նշեց կրթության փորձագետը: 

Նրա խոսքով՝ այսօր մենք հասել ենք մի իրավիճակի, որ  արդեն Խաչատուր Աբովյանին անվան մանկավարժական համալսարանը  հատկապես բնագիտական բաժիններում  մեծ խնդրի առջև է կանգնել, դիմորդ չկա:

«Ամենավատ վիճակը այսօր  գիտությունների և մանկավարժության բաժիններում է. պարադոքսն այն է, որ մենք 12 տարի դպրոցում երեխաներին սովորեցնում ենք այդ գիտությունները, բայց նրանք դրանք  չեն ընտրում՝ որպես մասնագիտություն: Այս պահի դրությամբ մանկավարժականի բնագիտական 4 առարկաների  բաժիններ ոչ ոք չի ընդունվել: Միակ  հույսն այն է, որ մնացած բուհերից  դուրս մնացած դիմորդները  կընդունվեն այդ բաժինները, սակայն հասկանալի է, որ նրանք մանկավարժ դառնալ չեն ցանկանում:   Պատկերացրեք, թե ինչ է սպասվում մեզ. մենք պետք է խոսենք ոչ թե ուսուցիչների որակի, այլ բացակայության  մասին»,-ահազանգեց  մասնագետը: 

Ըստ նրա՝ մեռնող մասնագիտական ուղղություններից է աշխարհագրությունը:

«Այս ուղղվածությամբ առավել հետաքրքրված են մարզերի դիմորդները, բայց նրանք էլ ֆինանսական խնդիրների պատճառով չեն դիմում: Հարկ է մտածել նրանց աջակցելու մասին:  Աշխարհագրությունը կործանվում է Հայաստանում, որի գծով  թեՙ մանկավարժական և  թեՙ  պետհամալսարան դեռ ոչ ոք չի դիմել, անգամ պետպատվերով տեղեր թափուր տեղեր կան: Եթե այսպես շարունակիվի,   աշխարհագրությսն ուսուցիչները  կարմիր գիրք կմտնեն»: 

Պատկան  մարմինների աշխատանքը գնահատելիս նա նշեց, որ  վերջիններս արդեն 6 տարի է  չեն կարողանում բարձրագույն կրթության  մասին օրենք ընդունել, թեև դա փրկություն չի համարում: 

«Կարծում եմ՝ ՀՀ կրթության և գիտության նախարարությունն այժմ մտածում է բուհերի օպտիմալացման մասին, քանի որ  թեՙ Ագրարային, թեՙ Մանկավարժական, թեՙ  Ճարտարագիտական համալսարանը լրջագույն խնդիրներ ունեն դիմորդների թվի ապահովման հետ կապված: Կառավարության ծրագրում կա  մինչև 2026թ.  ակադեմիական քաղաք ստեղծելու նախագիծ,  որի ներքո  բուհերը կմիավորվեն ու  դրանց  մի մասը, հավանաբար, Երևանից դուրս  կտեղակայվի: 

Պետք է նշեմ նաև, որ բուհերի միավորումը շատ տխուր բանի մասին է խոսում, այն մասին, որ  նախարարությունը չի կարողանում կրթական  այնպիսի որակ ապահովել, որ դիմորդների թվի աճ ապահովի»,-եզրափակեց Խաչատրյանը: