Վիկտորյա Բեքհեմը հայտարարել է, որ ամուսինը կրկնօրինակում է իր ոճը

Spice Girls-ի նախկին մենակատար և գործարար Վիկտորյա Բեքհեմը հեգնել է ամուսնուն՝ հայտարարելով, որ Դեյվիդը կրկնօրինակում է իր կերպարները։ Այդ մասին գրում է People-ը։

Բեքհեմները շարունակում են իրենց եվրոպական հանգիստը Միջերկրական ծովում` զբոսանավով նավարկելով։ Օրերս Վիկտորյա Բեքհեմը կիսվել է լուսանկարով, որում ինքը և Դեյվիդը կեցվածք են ընդունել միանման տեսքով. դիզայները հագած է կարմիր կետավոր զգեստ, իսկ ամուսինը՝ նույն գույնի պոլո։

«Կարծես ես նորից ոգեշնչեցի Դեյվիդին: Լրիվ զուգադիպություն»,- նկարը մակագրել է Վիկտորիան։

Իրենց հարաբերությունների սկզբում զույգը հաճախ էր հանրության առաջ հայտնվում նման կերպարներով: Հարցազրույցներից մեկում Վիկտորիան խոստովանել է, որ այն ժամանակ ինքը և Դեյվիդը պարզապես «միամիտ» էին նորաձևության հարցում։

«Այն ժամանակ ինձ շատ լավ գաղափար էր թվում: Կարծում եմ՝ այն ժամանակ միամտություն էր։ Մենք գլուխ չէինք հանում նորաձևությունից: Պարզապես զվարճանում էինք, և, ճիշտն ասած, այդպես էլ պետք է լինի», - ասել է նա: