Երիտասարդ հայրը որոշել է ամուսնալուծության հայց ներկայացնել դստեր ծննդյան պատճառով

Չինաստանի Չունցին քաղաքից Ռաո անունով գործարարը որոշել է ամուսնալուծության հայց ներկայացնել այն բանից հետո, երբ նրա կինը դուստր է ունեցել: Այս մասին հայտնում է AsiaOne-ը։

Երիտասարդ հայրը պնդում է, որ վստահ է եղել որդու լույս աշխարհ գալուն և ինը ամիս անհամբեր սպասել է այդ պահին։ Երբ աղջիկը ծնվեց, նա չափազանց զայրացել էր։ Տղամարդն իր վրդովմունքը կիսել է ընկերների հետ WeChat Moments հավելվածում։ «Ես չեմ կարող մեկ րոպե անգամ մնալ հիվանդանոցում։ Անցյալ կյանքում ես երևի ինչ-որ մեղք եմ գործել, և դրա համար էլ այսպիսի վատ բախտն ունեմ», - դժգոհել է նա: Այլ հաղորդագրություններում Ռաոն գրել է, որ հիասթափության պատճառով չի ցանկանում անուն ընտրել երեխայի համար և այժմ մտածում է ամուսնալուծության մասին։

Նրա ընկերներից մեկը սոցցանցերում հաղորդագրությունների սքրինշոթեր է հրապարակել։ Դրանք արագ վիրուսային են դարձել։ Ռաոն քննադատության է ենթարկվել օգտատերերի կողմից։ Տեղի ոստիկանությունը և Չունցինի կանանց ֆեդերացիան հայտնել են, որ տեղյակ են այդ հաղորդագրությունների մասին և կաջակցեն մորն ու դստերը, եթե նրանք վտանգի մեջ լինեն:

Ռաոն խոստովանել է, որ ինքն է գրել հրապարակված հաղորդագրությունները և պարզաբանել, որ ցանկանում էր ամուսնալուծվել կնոջից մինչև երեխայի ծնվելը։ «Ես բավականին ագրեսիվ բնավորություն ունեմ, հակված եմ ծայրահեղությունների, բայց իմ հաղորդագրությունները բացատրվում էին միայն բարձրաձայնելու ցանկությամբ», - բացատրել է երիտասարդ հայրը: Նա հավելել է, որ շարունակելու է կատարել իր պարտականությունները կնոջ և երեխայի նկատմամբ։