Առջևում Կոնգրեսի ընտրություններն են. Սասունյանը՝ Փելոսիի թայվանյան այցի և ամերիկահայության արձագանքի մասին

Վերջին օրերին համաշխարհային մասմեդիան լայնորեն քննարկում է ԱՄՆ կառավարության՝ նշանակությամբ երրորդ պաշտոնյայի՝ Կոնգրես Ներկայացուցիչների պալատի խոսնակ Նենսի Փելոսիի աղմկահարույց այցը՝ Թայվան:

Չնայած Չինաստանի նախազգուշացումներին ու վերջնագրերին, կին քաղաքական գործիչը չհրաժարվեց կղզի այցելելուց, ավելի՛ն՝ այնտեղի բարձրագույն ղեկավարության հետ հանդիպումներում հավաստիացրեց, որ Վաշինգտոնը կաջակցի Թայբեյին՝ ժողովրդավարության զարգացման հարցերում:

Անդրադառնալով Փելոսիի այցին, ԼՈՒՐԵՐ.com-ի հետ զրույցում «Կալիֆոռնիա Կուրիեր» («The California Courier») թերթի գլխավոր խմբագիր և հրատարակիչ Հարութ Սասունյանը նշեց, որ այդ համատեքստում, որպես կանոն, ամերիկացիների տեսակետները բաժանվում են դեմոկրատների և հանրապետականների:

«Պետք է նշեմ, որ հատկապես քաղաքական համատեքստում, դեմոկրատներն ու հանրապետականները այս ամենի վերաբերյալ հակառակ տեսակետներ ունեն: Փելոսիի այցի իրական նպատակը ամերիկյան ներքին քաղաքականությունն է, մանավանդ, որ նոյեմբերին տեղի են ունենալու Կոնգրեսի ընտրությունները»,- ասաց մեր զրուցակիցը:

Ըստ Սասունյանի, քանի որ ավելի վաղ Փելոսին հայտարարել էր Թայվան այցելելու մտադրության մասին, չէր կարող տեղի տալ Չինաստանի բողոքներին, որպեսզի թույլ գործիչ չհամարվի:

Ինչ վերաբերում է Փելոսիի թայվանյան այցի առնչությամբ ամերիկահայության արձագանքին՝ հատկապես նկատի առնելով Թայվանի և ԼՂ կարգավիճակի որոշակի ընդհանրությունը, «Կալիֆոռնիա Կուրիեր»-ի խմբագիրը նկատեց.

 «Ամերիկահայերն այնքան էլ հետաքրքրված չեն կոնգրեսականի այդ այցով: Մեզ համար կարևորը Հայաստանի ու Արցախի ճակատագիրն է: Մի մոռացեք, որ անկախ ամեն ինչից, ԱՄՆ-ն պաշտոնապես ընդունել է, որ Թայվանը Չինաստանի մաս է կազմում, և, ուրեմն, ինքնորոշման իրավունքի և կարգավիճակի հարց, որպես այդպիսին, չկա»:

Արա Ալոյան