Արարատի մարզում Nissan Murano-ն կողաշրջված հայտնվել է դաշտում․ անչափահաս վարորդն ու 3 ուղևորները հոսպիտալացվել են

Արարատի մարզում, այսօր՝ օգոստոսի 4-ին, խոշոր ավտովթար է տեղի ունեցել. ժամը 13։45-ի սահմաններում Nissan Murano մակնիշի ավտոմեքենան Մասիս-Նուբարաշեն ավտոճանապարհի օղակաձև խաչմերուկից դեպի 3-րդ կմ հատվածում դուրս է եկել հանդիպակաց երթևեկելի գոտի, բախվել քարերին և կողաշրջված վիճակում հայտնվել դաշտում։

Shamshyan.com-ի  հաղորդմամբ, վթարի հետևանքով 4 անչափահասներ տարբեր աստիճանի մարմնական վնասվածքներով տեղափոխվել են «Սուրբ Աստվածամայր» բժշկական կենտրոն։  Վիրավորներին առաջինն օգնության են հասել վթարի հարևանությամբ գործող ավտոտեխսպասարկման կետի աշխատակիցները և օպերատիվորեն ժամանած Մասիսի հիվանդանոցի բժիշկների հերթապահ խմբերը, որոնք վիրավորներին մինչև հիվանդանոց տեղափոխելը, տեղում առաջին բուժօգնությունն են ցուցաբերել։

Ոստիկանությունն ու քննչական բաժինը պարզում են վարորդի և վիրավորների ինքնությունը։  Վթարի փաստով Մասիսի քննչական բաժնում վարույթ  է նախաձեռնվել։  Դեպքի վայրում հավաքվածներն ասում էին նաև, որ վարորդն ու վիրավորները անչափահաս տղաներ են։