ՔՊ-ական պաշտոնյաների «օդում հնչեցրած» մեղադրանքները. ում և ինչու են թիրախավորել հեղափոխականները

Վարչապետ Նիկոլ Փաշինյանը երեկ ելույթ ունենալով ԱԺ-ում ակնարկեց, որ ԱԱԾ-ում, թե նախկինում, թե նաև իր ղեկավարման տարիներին եղել են օտարերկրյա գործակալներ` ակնարկելով այժմ ընդդիմադիր Արթուր Վանեցյանին: Սա առաջին դեպքը չէ, երբ Փաշինյանը կամ թիմակիցները մեղադրանքներ են հնչեցնում նախկին պաշտոնյաների, նույնիսկ իրենց  նախկին թիմակիցների հասցեին, սակայն մինչ օրս հանրությունը չի ստացել այդ մեղադրանքները ապացուցող փաստերը, իսկ շատ դեպքերում դատարանը հերքել է ՔՊ-ականների այդ մեղադրանքները:

Դիցուք՝ Նիկոլ Փաշինյանը հայտարարում էր, որ  Սերժ Սարգսյանը խաղատներում պարտվում է մեր երկրի բյուջեն՝ մսխելով մեր պետականությունը: Հովիկ Աբրահամյանին Նիկոլ Փաշինյանը մեղադրում էր ապօրինի հարստացման մեջ և առաջարկում էր Մոնումենտի դղյակները դարձնել թանգարան, որտեղ վարչապետը կաշխատի որպես գիդ: Սերժ Սարգսյանի եղբորը՝ Սաշիկ Սարգսյանին, Փաշինյանը մեղադրում էր Հայաստանում գոյություն ունեցող բոլոր քիչ թե շատ խոշոր բիզնեսին փայ մտնելու մեջ, բացի այդ, ըստ Փաշինյանի, նրան էր պատկանում արագաչափերի բիզնեսը: ԳՇ նախկին պետ Օնիկ Գասպարյանին Նիկոլ Փաշինյանը մեղադրում էր Շուշին հանձնելու մեջ: Այս մեղադրանքներից և ոչ մեկը մինչ այս պահը չեն հաստատվել:

Ամիսներ առաջ Երևանի ընդհանուր իրավասության դատարանը՝ նախագահությամբ դատավոր Սարգիս Երիցյանի, բավարարել է Սերժ Սարգսյանի փեսա Միքայել Մինասյանի հոր՝ Արա Մինասյանի հայցն ընդդեմ առողջապահության նախարար Արսեն Թորոսյանի ու նախարարության՝ պարտավորեցնելով Թորոսյանին ներողություն խնդրել ու հերքել զրպարտություն համարվող տվյալները։ Սակայն, Արսեն Թորոսյանը, ինչպես երևում է, իրեն օրենքից վեր է դասել և հրաժարվել է կատարել դատարանի վճիռը։

Դատարանը նմանատիպ որոշում կայացրել էր նաև ՍԴ նախկին նախագահ Հրայր Թովմասյանի մասով` պահանջելով Փաշինյանից ներողություն խնդրել վերջինիս հայտնի գրիչի թեմայով զրպարտելու համար։ Երկու դեպքում էլ Փաշինյանը իրեն օրենքից վեր է դասել և չի կատարել դատարանի որոշումը։

ՀՀ շրջակա միջավայրի նախկին նախարար, պետական վերահսկողական ծառայության ղեկավար Ռոմանոս Պետրոսյանը պարտվել է դատարանում: Կհիշեք՝ 2021 թվականին, երբ ՇՄ նախարարը Ռոմանոս Պետրոսյանն էր, Իջևանի դենդրոպարկի տնօրեն Մեխակ Սայադյանին ազատեց աշխատանքից: Ռոմանոս Պետրոսյանի ղեկավարած նախարարության հիմնավորումն այն էր, որ Իջևանի դենդրոպարկի տնօրեն Մեխակ Սայադյանի նկատմամբ վստահությունը կորել է: Սրանից հետո Իջևանի դենդրոպարկի նախկին տնօրեն Մեխակ Սայադյանը դիմել էր վարչական դատարան՝ վիճարկելով իրեն դենդրոպարկի տնօրենի պաշտոնից ազատելու հրամանի օրինականությունը:

Հետ չի մնում նաև Երևանի քաղաքապետ Հրաչյա Սարգսյանը: Դիցուք՝ կինոգործիչներն ահազանգում են, որ դեռևս մայիսին Վարչական դատարանի որոշմամբ` կասեցվել է Կինոյի տան ներքին բակում կառուցվող գարեջրատան շինարարությունը, սակայն Երևանի քաղաքապետարանն անտեսում է դատարանի որոշումը, և շինարարությունը մեծ թափով շարունակվում է: Նրանց խոսքով` ծառահատված բակն արդեն բետոնապատվել է, իսկ իրենց ահազանգերը քաղաքապետարանի թեժ գիծ անարդյունք են:

Ամիսներ առաջ, երբ տեղեկություն տարածվեց, որ Ադրբեջանից հայ ռազմագերիների խումբ է ժամանելու Հայաստան, հետագայում պարզվեց, որ ինքնաթիռը վայրէջք է կատարել առանց գերիների։ Ձևավորված ավանդույթի համաձայն՝ ՔՊ-ականները սկսեցին իրենց ապաշնորհությունը բարդել այլոց վրա, այս անգամ էլ թիրախում Ռոբերտ Քոչարյանն էր։ Փաստորեն իշխանությունները չկարողացան գերիներ բերել Հայաստան, իսկ դրա համար մեղավոր են նշանակել Քոչարյանին։ Մասնավորապես մի ՔՊ-ական՝ Նաիրի Փեթակչյանը, ֆեյսբուքյան իր էջում գրել է․

Արարատի մարզպետ աշխատելիս Գարիկ Սարգսյանը ամեն գնով փորձում էր ճնշել Ավշարի միջնակարգ դպրոցում ծագած բունտըլ հայտարարելով, որ ուսուցիչների հետևում հայտնի քաղաքական ուժեր են կանգնած, նկատի ունենալով՝ Ավշարի Արայիկին և ՀՀԿ-ին: Սակայն, այդ մեղադրանքը չհաստատվեց, ուսուցիչներն էլ դատարանում հաղթեցին մարզպետին:

ՊԵԿ նախագահ Ռուստամ Բադասյանը վերջին հարցազրույցներից մեկում չէր բացառել, որ մաքսային ոլորտում կոռուպցիա կա: Ինչ խոսք՝ նա նկատի ուներ արդեն իսկ պաշտոնից հեռացած և այդ ոլորտը կուռացիայի ենթարկող Շուշանիկ Ներսիսյանին, ով իր հերթին հարցազրույցներում ակնարկներով նույն մեղադրանքը ուղղել է Բադասյանի հասցեին: Սակայն, երկու պաշտոնյայի հայտարարություններն էլ դեռևս ուսումնասիրոթյան առարկա չեն դարձել:

ԱԳՆ նախկին ղեկավար Արա Այվազյանը երկրի բարձրագույն ղեկավարությանը, հատկապես՝ Նիկոլ Փաշինյանին մեղադրում էր պետական շահերին դեմ գործելու մեջ: Սա ոչ այլ ինչ է, քան պետական դավաճանության հոդվածով հանցագործության մասին հաղորդում, սակայն, պատկան մարմինները ոչ հերքել են, ոչ հաստատել Այվազյանի հնչեցրած այս մեղադրանքը:

Ինչպես տեսնում ենք՝ Փաշինյանը իր օդում հնչեցվող պոպուլիստական մեղադրանքների մեջ բնավ էլ միայնակ չէ, հակառակ դեպքում հարց է առաջանում` ինչու ՔՊ-ական պաշտոնյաների կողմից իրենց քաղաքական վիզավիների հասցեին արտահայտած մեղադրանքներն այդպես էլ չեն հաստատվում...