«Ապագա» խոստացող ՔՊ-ական պատգամավորները կրկին «քցեցին» իրենց ընտրողներին

Հայաստանի և Ադրբեջանի միջև սահմանային վերջին լարվածությանը, որը վերածվեց լայնածավալ ռազմական գործողությունների, նախորդել էին ՏԻՄ ընտրությունների քարոզարշավը: Այդ քարոզարշավին Սյունիքի, Գեղարքունիքի և Վայոց Ձորի մարզերում ակտիվորեն մասնակցում էին ՔՊ-ական պատգամավորները, որոնք ԱԺ-ում հայտնվել են հենց այս մարզերի բնակիչների տված քվեերի շնորհիվ:

Գեղարքունիքից պատգամավոր ընտրված ՔՊ-ական Նարեկ Գրիգորյանը քարոզարշավի ընթացքում խոստանում էր Գավառում բոլոր մանկապարտեզները դարձնել անվճար, համայնքը հռչակել երիտասարդական մայրաքաղաք, խոստանում էր բազմաթիվ ներդրումային ծրագրեր բերել: Սակայն, տարակուսելի է, որ պատերազմի օրերին Գրիգորյանը բավական պասիվ էր, ռազմական գործողությունների ավարտից հետո էլ ակտիվությամբ աչքի չի ընկնում: Հարց է առաջանում՝ ինչո՞ւ: Արդյո՞ք այս պահին Գեղարքունիքի մարզի բնակիչները չունեն պատգամավորի աջակցության կարիքը, առնվազն բարոյական, ի վերջո նա հայտնվել է ԱԺ-ում հենց վերջիններիս տված քվեի շնորհիվ:

Նույնը կարելի է ասել նաև  Սյունիքից ընտրված ՔՊ-ական պատգամավորների մասին: Դիցուք՝ Արմեն Խաչատրյանը, ով նախորդ տարի հայտարարում էր, որ Սյունիքում իրեն շատ են սիրում, փափուկ բարձ էր դնում սյունեցիների գլխի տակ, որ Սյունիքում թշնամին երբեք առավելության չի կարող հասնել, անգամ ժամանակին պնդում էր որ հանձնված Գորիս-Կապան ճանապարհն է անվտանգ: Ո՞ւր էր պատերազմի օրերին և դրանից հետո Խաչատրյանը:

Սյունիքից ընտրված մեկ այլ պատգամավոր էլ Նարեկ Ղահրամանյանն է, ով ձայնը վերջին օրերին նույնպես չի լսվում: Վերջինիս ֆեյսբուքյան էջի ուսումնասիրությունից պարզ է դառնում, որ Ղահրամանյանը պատերազմի օրերին բավարարվել է ընդամենը երկու գրառում անելով, որոնցից մեկում, ըստ էության, պաշտպանում էր Փաշինյանին` պնդելով, որ որևէ փաստաթուղթ չի ստորագրվելու, մյուսում արդեն ամսի 20-ին գրում էր, որ Ներքին Հանդում կրակոցներ այլևս չկան: Դժվար է ասել, թե ինչու է պատգամավորը աշխատում ՊՆ կամ Փաշինյանի խոսնակ, սակայն, մի բան ակնհայտ է ՝ նա իրեն ընտրողների կողքին չէր այս դժվարին օրերի ընթացքում:

Սյունիքից ընտրված մեկ այլ պատգամավոր Կարեն Համբարձումյանի ֆեյսբուքյան էջում միայն Փաշինյանի վերջին լայվն է: Իսկ մինչ պատերազմը Համբարձումյանը ակտիվ քարոզարշավի մեջ էր՝ Սիսիանում առաջ մղելով իր բարեկամ Արմեն Հակոբջանյանի թեկնածությունը: Ինչ խոսք՝ խոստումներ տալուց պատգամավորը շատ ավելի ակտիվ է, քան դրանք ի կատար ածելուց:

ՔՊ-ական սյունեցի պատգամավորներից թերևս ամենաակտիվը Դավիթ Դանիելյանն էր, վերջինս գոնե մեկնաբանում էր լրագորղների հարցրերին և ներկայացնում իրավիճակը Սյունիքում, սակայն, ակնհայտ է, որ նա ամսի 13-14-ը գտնվել է Երևանում՝ մասնակցել ԱԺ նիստերին: Դանիելյանի մասով էլ կարող ենք ասել, որ վերջինս շատ ավելի ակտիվ էր ՏԻՄ ընտրությունների նախօրեին, քարոզարշավների ընթացքում` սյունեցիներին խոստանալով խաղաղ ապագա:

Ինչպես տեսնում ենք՝ ռազմական գոտու վերածված տարածքներից ընտրված երեսփոխանները ընտրություններից գրեթե մեկ տարի անց միայն իրենց ընտանեկան բյուջեներում են առաջընթաց ապահովել, սակայն ոչ մի լումա, ոչ մի միլիմիետր տեղաշարժ Սյունիքի անվտանգային, սոցիալ-տնտեսական հարցերի լուծման ուղղությամբ չեն ապահովել: Փաստացի, նրանք սեփական ընտրողին միայնակ են թողել իրենց իսկ բերած ապագայի հետ դեմ հանդիման...