Քո գրպանից՝ ՔՊ-ականների ընտանեկան բիզնեսներին. «թավշյա» արտոնյալները

Կառավարությունն իր այսօրվա՝ սեպտեմբերի 22-ի նիստում որոշեց գերակա ոլորտում իրականացվող ներդրումային ծրագրի շրջանակներում մաքսատուրքից ազատել «ԱՐՏ ԳԼՈԲԱԼ» սահմանափակ պատասխանատվությամբ ընկերությանը: Նախատեսվում է ներդրումային ծրագրի շրջանակներում ստեղծել 24 նոր աշխատատեղ՝ մինչև 195 հազ դրամ միջին ամսական աշխատավարձով։ Արտոնություն ստանալու համար ներկայացված ապրանքների արժեքը կազմում է2 մլրդ դրամ: Մաքսատուրքից ազատման արտոնությունը գնահատվում է 100 մլն դրամ: Մեկ տարի առաջ էլ  կառավարության նիստում որոշում կայացվեց 13 միլիոն դրամի մաքսային արտոնություն տրամադրել «Արտ գլոբալ» ընկերությանը; Ընկերությունը Չինաստանից ներմուծելու է ստվարաթուղթ, որն օգտագործելու է թղթե և ստվարաթղթե արտադրատեսակների (թղթե բաժակներ, ափսեներ) արտադրության մեջ: «Արտ գլոբալ»-ը խոստացել է ծրագրի շրջանակներում իրականացնել 250 մլն դրամի ներդրումներ, ստեղծել 20 նոր աշխատատեղ՝ 150 000 դրամ միջին աշխատավարձով։ Ուշագրավն այստեղ այն է, որ այս ընկերությունը պատկանում է ՔՊ-ական նախկին պատգամավոր, այժմ Չինաստանում առևտրային կցորդ աշխատող Արտաշես Պետրոսյանի ընտանիքին:

Ամիսներ առաջ էլ կառավարության նիստում որոշում ընդունվեց «ԻԲԱՐԻ» ՍՊԸ-ին ազատել մաքսատուրքից։ Ըստ նախագծի` ընկերությունը Երեւանում եւ Աշտարակում մեղրի, ջեմերի, մուրաբաների, նռան գինու արտադրության համար ներմուծվող տեխնոլոգիական սարքավորումների, հումքի եւ նյութերի ներմուծման մաքսատուրքից ազատվում է։ «ԻԲԱՐԻ» ՍՊԸ-ն հիմնադրվել է 2017-ին, որի հիմնադիրներից է առողջապահության նախարար Անահիտ Ավանեսյանի ամուսինը՝ Ստեփան Ավանեսյանը։

Կառավարության մեկ այլ նիստում էլ որոշում էր կայացվել բավարարել «Ջերմուկ գրուպ» ընկերության կողմից ներկայացված հայտը գերակա ոլորտում իրականացվող ներդրումային ծրագրի շրջանակներում ներմուծված (ներմուծվող) տեխնոլոգիական սարքավորումները, դրանց բաղկացուցիչ ու համալրող մասերը, հումքը եւ (կամ) նյութերը ներմուծման մաքսատուրքից ազատելու արտոնությունից օգտվելու համար եւ սահմանված կարգով կիրառել համապատասխան արտոնությունը: «Ջերմուկ գրուպ»-ը պատկանում է Աշոտ Արսենյանի ընտանիքին, իսկ նրա որդին՝ Վահագն Արսենյանը, Ջերմուկի համայնքապետ է  ընտրվել ՔՊ ցուցակով:

Արդյո՞ք իրավիճակ է փոխվել, թերևս ոչ: Դիցուք՝ 2014-ին ՀՀԿ-ական առավարությունը որոշեց Սամվել Ալեքսանյանի ընկերությանն արտոնություն տալ եւ մինչեւ 2017 թվականը հետաձգել ներմուծվող 1,32 միլիարդ դրամ արժեցող ապրանքների ավելացված արժեքի հարկի վճարման ժամկետը հետաձգել մինչեւ 2017 թվականը: Ընկերությունը խոստացել է  տեղադրել սպիրտի արտադրության նոր, միջազգային չափորոշիչներին համապատասխանող սարքավորումներ՝ կատարելով 1.32 մլրդ դրամի չափով ներդրում, աշխատատեղեր բացել, արտադրանքի 25% էլ արտահանել Վրաստան, Ռուսաստան եւ Իրաք:

Ստացվում է, որ թե՛ նախկինների, թե՛ հեղափոխականների համար թայֆայական գործելաոճը օտար չէ, և նրանք չեն զլանում հարկատուների գրպանից արտոնություններ շռայլել իրենց թիմակիցների ընտանեկան բիզնեսներին...