«Ուկրաինայի դեմ ագրեսիային աջակցելու հետևանքները շատ ավելի մեծ կլինեն»․ Կիևը՝ Թեհրանին

Ուկրաինան տեղյակ չէ իրանական օբյեկտներում պայթյունների պատճառների մասին, սակայն Կիևը բազմիցս զգուշացրել է Թեհրանին, որ Ուկրաինայի դեմ ագրեսիային աջակցելու հետևանքները շատ ավելի մեծ կլինեն, քան Ռուսաստանի Դաշնության հետ համագործակցության առավելությունները, ասել է Ուկրաինայի արտաքին գործերի նախարարության խոսնակ Օլեգ Նիկոլենկոն։ Այս մասին հաղորդում է Interfax-ը։

Նիկոլենկոն ֆեյսբուքյան իր էջում մեկնաբանել է մամուլում հայտնված այն տեղեկությունը, թե Ուկրաինայի գործերի ժամանակավոր հավատարմատարն այսօր հրավիրվել է Իրանի ԱԳՆ։

«Ուկրաինան բազմիցս զգուշացրել է Իրանին, որ Ուկրաինայի դեմ ագրեսիային աջակցելու հետևանքները շատ ավելի մեծ կլինեն, քան Ռուսաստանի հետ համագործակցության առավելությունները։ Մենք տեղյակ չենք Իրանի օբյեկտներում պայթյունների պատճառների մասին։ Բայց ինչպես ասում է պարսկական ժողովրդական իմաստությունը՝ մի վնասիր ուրիշին, և ինքդ քեզ չես վնասի»,- գրել է ԱԳՆ խոսնակը։

Ավելի վաղ Reuters-ը, հղում անելով Tasnim լրատվական գործակալությանը, հայտնել էր, որ Իրանը երկուշաբթի օրը կանչել է Թեհրանում Ուկրաինայի գործերի ժամանակավոր հավատարմատարին՝ Իրանի կենտրոնական Սպահան նահանգում ռազմական գործարանի վրա անօդաչու թռչող սարքի հարվածի մասին իր երկրի մեկնաբանությունների պատճառով: