Թեհրանն անընդունելի է համարում Մոսկվայի միջամտությունն Իրանի տարածքային ամբողջականության հետ կապված հարցերին․ Աբդոլլահիան

Իրանի իշխանությունները չեն ճանաչում Ռուսաստանի կողմից ուկրաինական տարածքների բռնակցումը և հանդես են գալիս բոլոր պետությունների տարածքային ամբողջականության հարգման օգտին։ Այդ մասին Թեհրանում կայացած մամուլի ասուլիսում հայտարարել է Իրանի արտգործնախարար Հոսեյն Ամիր Աբդոլլահիանը։

«Մենք հավատում ենք յուրաքանչյուր երկրի տարածքային ամբողջականությանը, այդ թվում՝ Ուկրաինայինը, որը պետք է լինի բոլոր երկրների գլխավոր առաջնահերթությունը՝ միջազգային իրավունքի հիման վրա», - ասել է նա՝ հավելելով, որ Թեհրանը պնդում է, որ անհրաժեշտ է պատերազմը դադարեցնել «քաղաքական երկխոսության միջոցով»։

Թեհրանը նաև անընդունելի է համարում Մոսկվայի միջամտությունը Իրանի տարածքային ամբողջականության հետ կապված հարցերին, ընդգծել է նախարարը՝ ակնարկելով Պարսից ծոցի արաբական երկրների համագործակցության խորհրդում ծագած դիվանագիտական ​​սկանդալին։