Թուրքմենստանը պատրաստ է իրականացնել Կասպից ծովի հատակով գազատարի կառուցման նախագիծը

Թուրքմենստանը պատրաստ է իրականացնել Կասպից ծովի հատակով գազատարի կառուցման նախագիծը, հայտարարել է երկրի ԱԳՆ–ն։

«Աշխաբադը և Բաքուն կարծում են, որ նման անդրկասպյան խողովակաշարի անցկացման համար բավարար է այն երկրների համաձայնությունը, որոնց տարածքով այն կանցնի։

Ռուսաստանն ու Իրանը դեմ են այս մոտեցմանը` նշելով, որ բոլոր հինգ մերձկասպյան երկրներն իրավունք ունեն մասնակցել նախագծի բնապահպանական համապարփակ փորձաքննությանը»,- գրում է Sputnik–ը։ 

Ավելի վաղ Ադրբեջանի նախագահ Իլհամ Ալիևը Շուշիում տեղի ունեցած մեդիա ֆորումի ժամանակ հայտարարել էր, որ ադրբեջանական գազի մատակարարումների աշխարհագրությունը ընդլայնվում է։ Նա հույս էր հայտնել, որ մինչև 2023 թվականի վերջը ներկրողների ցանկը կհամալրի ևս երկու եվրոպական երկիր։ Այս ցանկը կարող է էլ ավելի ընդլայնվել, եթե Թուրքմենստանը որոշի համագործակցել Եվրամիության հետ և պայմանավորվել Տրանսկասպյան խողովակաշարի կառուցման շուրջ։ Ադրբեջանական գազը նաև կգնա դեպի արևելք՝ Պակիստան։

Իսլամաբադի եւ Բաքվի միջեւ համաձայնագիրը կստորագրվի հուլիսի 24-ին։