ՄԱԿ-ը կոչ է արել ազատ արձակել Նիգերի նախագահ Բազումին

ՄԱԿ-ի գլխավոր քարտուղար Անտոնիո Գուտերեշը Նիգերի ռազմական ապստամբներին կոչ է արել ազատ արձակել նախագահ Մուհամեդ Բազումին։ Այս մասին ասված է համաշխարհային կազմակերպության ղեկավարի գրասենյակի հաղորդագրության մեջ, որը հրապարակվել է ՄԱԿ-ի կայքում։

Հայտարարության մեջ ասվում է, որ գլխավոր քարտուղարը խստորեն դատապարտում է Նիգերում հուլիսի 26-ին հայտարարված հակասահմանադրական իշխանափոխությունը։

«Նա խորապես մտահոգված է նախագահ Մուհամեդ Բազումի կալանավորմամբ և մտահոգված է նրա անվտանգության ու առողջության համար: Նա կոչ է անում բոլոր նրանց, ովքեր ներգրավված են այս դատապարտելի արարքի մեջ, անհապաղ և առանց որևէ պայմանի ազատ արձակել նախագահին»,- ասված է հայտարարության մեջ։

Բացի այդ, Գուտերեշը կոչ է արել դադարեցնել «Նիգերում ժողովրդավարական սկզբունքները խարխլող» գործողությունները, ինչպես նաև զերծ մնալ բռնության կիրառումից և հարգել օրենքի գերակայությունը։

Հուլիսի 26-ի առավոտյան Նիգերի նախագահական գվարդիան ձերբակալել է նախագահ Բազումին մայրաքաղաքում գտնվող իր նստավայրում։ Նախագահի գվարդիան արգելափակել է մուտքը Բազումի նստավայր և մերժել է նրան ազատ արձակելու բանակցողների խնդրանքը։ Հաղորդվում էր, որ ապստամբները պարտադրել են նախագահին ստորագրել իր հրաժարականը, սակայն նա հրաժարվել է անել դա։