Չինաստանում երեխաներն այլևս չեն կարողանա ազատ օգտվել սմարթֆոններից ու համացանցից

Չինաստանի կիբերտարածության վարչությունը ներկայացրել է անչափահասների համար բջջային սարքերի և ինտերնետի օգտագործման նոր կանոնների նախագիծ: Օրինագծի ընդունման դեպքում դեռահասները սմարթֆոններ օգտագործելու համար կսահմանափակվեն օրական առավելագույնը երկու ժամով, հայտնում է Rozetked պորտալը՝ վկայակոչելով Չինաստանի դեպարտամենտի փաստաթուղթը։

Նախագծի համաձայն՝ մինչև 8 տարեկան երեխաներին թույլատրվում է սմարթֆոններով զբաղվել օրական ոչ ավելի, քան 40 րոպե, 8-15 տարեկան երեխաներին՝ օրական մեկ ժամից ոչ ավելի, իսկ 16-17 տարեկան դեռահասներին՝ օրական երկու ժամից ոչ ավելի: Եվ ամեն կես ժամը մեկ սարքը պետք է օգտագործողին հիշեցնի ընդմիջման անհրաժեշտության մասին։

Միաժամանակ, անչափահասների համար բջջայինով ինտերնետ հասանելիությունը փակ կլինի ժամը 22:00-06:00-ը: Բացառություն են կազմում կրթական հավելվածները, անձնական անվտանգության ծառայությունները, շտապ օգնության կանչերը և մտավոր և ֆիզիկական զարգացման հավաստագրված ծրագրերը:

2021 թվականին Չինաստանն արդեն ներմուծել է կանոն, ըստ որի՝ խաղային հարթակները կարող են ծառայություններ մատուցել միայն անչափահասներին 20:00-21:00-ը՝ ուրբաթ, շաբաթ, կիրակի օրերին և պետական ​​տոներին: