Իսրայելը դժգոհ է Ռուսաստանից

Իսրայելում Ռուսաստանի դեսպան Անատոլի Վիկտորովը կանչվել է երկրի ԱԳՆ՝ պաղեստինյան ՀԱՄԱՍ շարժման՝ ավելի վաղ Մոսկվա կատարած այցի պատճառով։ Այս մասին հայտնել է Իսրայելի ԱԳՆ մամուլի ծառայությունը՝ նշելով, որ բողոք է արտահայտվել դեսպանին։

«Իսրայելում Ռուսաստանի դեսպան Անատոլի Վիկտորովն այսօր առավոտյան կանչվել է Երուսաղեմ՝ Իսրայելի արտգործնախարարություն՝ որպես բողոք ՀԱՄԱՍ-ի պատվիրակության Մոսկվա կատարած այցի կապակցությամբ», - ասվում է մամուլի ծառայության հայտարարության մեջ, որը հրապարակվել է Facebook-ում: Զեկույցում նշվում է, որ արտաքին գործերի նախարարության Եվրասիական հարցերով գլխավոր տնօրենի տեղակալ, դեսպան Սիմոն Հալպերինն ասել է, որ Մոսկվան պետք է դատապարտի ՀԱՄԱՍ-ին։

ՀԱՄԱՍ-ի ներկայացուցիչները Մոսկվա են ժամանել հոկտեմբերի 26-ին։ Կողմերը քննարկել են Գազայի հատվածում տիրող իրավիճակը։ Պատվիրակությունը բարձր է գնահատել Ռուսաստանի նախագահ Վլադիմիր Պուտինի՝ Պաղեստին պետություն ստեղծելու առաջարկը։

Իսրայելի և Պաղեստինի միջև պատերազմը սկսվել է հոկտեմբերի 7-ին՝ ՀԱՄԱՍ-ի զինյալների ներխուժմամբ։ Իսրայելը ներկայումս ցամաքային գործողություն է իրականացնում Գազայի հատվածում։