Ուր են և ինչու են լռում Հայաստանի խոշոր գործարարներն ու պաշտոնյաները. Հայկ Մկրտչյան

ԼՈւՐԵՐ.com-ը շարունակում է անդրադառնալ այն պաշտոնյաներին և գործարարներին, ովքեր երկար տարի զբաղեցրել են պետական և ռազմական պաշտոններ, Արցախի և Հայաստանի անունը հոլովելով բիզնես են դիզել, իսկ այսօր, երբ Արցախը գրեթե կորսված է, իսկ Հայաստանը գտնվում է լրջագույն վտանգների առջև, նրանք նախընտրում են լռել, ասես ոչինչ էլ տեղի չի ունեցել:

Այսօր կանդրադառնանք Կոտայքի մարզպետի տեղակալ Հայկ Մկրտչյանին: Վերջինս մինչ հեղափոխությունը քաղաքականությամբ չի զբաղվել, թեև հանդիսանում է ՔՊ հիմնադիր անգամ, քաղաքական ակտիվության մեջ նույնպես չի նկատվել: Ահա նրա կենսագրության որոշ ուշագրավ դրվագներ. 1999-2000թթ. ՌԴ, ք․ Ուֆա «Բաշկիրստրոյ» ՓԲԸ շինհրապարակի ղեկավար, 2000-2002թթ. «Նորիկ Տեր Գրիգորյան» ՍՊԸ տնօրենի տեղակալ, 2003-2005թթ. ՌԴ, ք. Մոսկվա ,2005-2007թթ. «Էներգոցանցշին» ԲԲԸ մատակարարման բաժնի ղեկավար, 2007-2014թթ. «Հայկլեռշին» համահիմնադիր - նախագահ, 2019-2020թթ. Արտաշատ ՋՕԸ փոխտնօրեն, 2020-2021թթ. Առինջ համայնքի ղեկավարի պաշտոնակատար: 

Մկրտչյանի կենսագրության ամենաուշագրավ կետը, սակայն, վերաբերվում է ԶՈՒ-ում նրա ծառայությանը: Պարզվում է, որ փոխմարզպետը 1996-1998 թվականներին ծառայել է ԼՂՀ ՊԲ-ում՝ պահեստազորի սպա է: Եվ, անշուշտ, հարց է առաջանում` արդյո՞ք Կոտայքի փոխմարզպետը ոչինչ չունի ասելու մի իրավիճակում, երբ իր քաղաքական թիմի վարած ապաշնորհ քաղաքականության արդյունքում այսօր բանակը, որտեղ նա ծառայել է՝ ԼՂ ՊԲ-ն, կազմալուծվել է: Առավելագույնը, ինչին ձգում է Մկրտչյանը, դա պատերազմում զոհված զինծառայողների հարազատներին պարգևատրելն է; Այսպես, օրինակ, Աբովյանի երաժշտական դպրոցում փոխմարզպետը հետմահու պետական պարգևներ էր հանձնել 2022թ սեպտեմբերյան ագրեսիայի հետևանքով ծավալված մարտական գործողությունների ընթացքում Կոտայքի մարզից զոհված ժամկետային և պայմանագրային զինծառայողների հարազատներին:

2020 թվականի հոկտեմբերի 20-ին փոխմարզպետը հայրենասիրական գրառում էր արել իր ֆեյսբուքյան էջում.

Այսօր փաստացի կորսված է Արցախը, ՊԲ-ն կազմալուծվել է, զինվորները բախվում են բազմաթիվ խնդիրների, իսկ առաջնագիծը լի է նորանոր անվտանգային ռիսկերով: Սակայն փոխմարզպետ Մկրտչյանը լռում է և չի ցանկանում պաթոսային գրառումներից զատ որևէ քաղաքական գնահատական հնչեցնել ստեղծված իրավիճակի վերաբերյալ: Ինչպես ասում են՝ պաշտոնը բավական քաղցր բան է և շատ հաճախ կարող է ստիպել դառնալ լռակյաց և մի կողմ դնել նաև սեփական սկզբունքները, որոնք ժամանակին պաշտպանում էիր:

Շարունակելի...