Գազայի հատվածում 1 մլն երեխայի կյանք մազից է կախված. ՅՈւՆԻՍԵՖ

Գազայի հատվածում մեկ միլիոն երեխայի կյանքը կախված է մազից, ասել է ՅՈՒՆԻՍԵՖ-ի Մերձավոր Արևելքի և Հյուսիսային Աֆրիկայի տարածաշրջանային տնօրեն Ադել Խոդրը, գրումմ են միջազգային ԶԼՄ-ները:

«Հազարավոր երեխաներ շարունակում են մնալ Գազայի հյուսիսում, քանի որ կռիվները սաստկանում են: Այս երեխաները գնալու տեղ չունեն և մեծ վտանգի տակ են»,- ասվում է Խոդրի հայտարարության մեջ: «Հիվանդանոցների պաշտպանությունը և կենսական նշանակություն ունեցող բժշկական պարագաների մատակարարումը պատերազմի ժամանակ պատասխանատվություն է, և երկուսն էլ հիմա անհրաժեշտ են»:

Ըստ ՅՈՒՆԻՍԵՖ-ի՝ դեռևս մարտերի սկսվելուց առաջ Գազայի հատվածում երեխաների առողջապահական ծառայությունները լրջորեն ծանրաբեռնված էին. առողջապահության ոլորտը չուներ անհրաժեշտ ֆիզիկական ենթակառուցվածքներ, բժշկական սարքավորումներ, և ծառայությունները, ներառյալ ջրամատակարարումը, հաճախ ընդհատվում էին էլեկտրաէներգիայի անջատումների պատճառով:

Նշվում է նաև, որ ավելի քան 1,5 միլիոն տեղահանվածներ, այդ թվում՝ 700 հազար երեխա, ներկայումս դժվարությամբ են ապահովված ջրի հասանելիությամբ և ապրում են սանիտարական սարսափելի պայմաններում։ Ամեն օր ավելանում է ջրային և այլ հիվանդություններով վարակվելու վտանգը, ինչը հատկապես երեխաների համար է վտանգավոր։