Իրանի ԱԳ նախարարը հայտարարել է, որ Մերձավոր Արևելքում հակամարտության էսկալացիա չի ցանկանում

Իրանը դիվանագիտական ​​ուղիներով տեղեկացրել է ԱՄՆ-ին, որ չի ցանկանում, որ հակամարտությունն ընդլայնվի Մերձավոր Արևելքում, սակայն Իսրայելի և ԱՄՆ-ի գործողությունները կարող են հանգեցնել դրան։ Այս մասին Financial Times-ին տված հարցազրույցում հայտարարել է Իրանի արտգործնախարար Հոսեյն Ամիր Աբդոլլահիանը։

«Իրանը չի ցանկանում, որ պատերազմը տարածվի, բայց […] եթե Գազայի և Արևմտյան ափի բնակիչների դեմ հանցագործությունները չդադարեն, կարելի է դիտարկել բոլոր հնարավորությունները, և ավելի լայն հակամարտությունը կարող է անխուսափելի լինել», - ասել է Աբդոլլահիանը:

Նրա խոսքով՝ Իրանն ու ԱՄՆ-ն փոխանակվում են հաղորդագրություններով Թեհրանում Շվեյցարիայի դեսպանատան միջոցով, կողմերի միջև ուղիղ բանակցություններ չեն սպասվում։

Աբդոլլահիանն ընդգծել է, որ ԱՄՆ-ն չի սպառնացել Իրանին հետեւանքներով, եթե Թեհրանի կողմից աջակցվող լիբանանյան շիական «Հեզբոլլահ»-ը պատերազմի մեջ մտնի: Միաժամանակ նա նշել է, որ «Հեզբոլլահ»–ին ուղղված ԱՄՆ կոչերը չեն ստիպի նրան ավելի զգույշ լինել։ Նախարարի խոսքով՝ ԱՄՆ-ն Իսրայելին իր աջակցությամբ նպաստում է լարվածության սրմանը, մինչդեռ ԱՄՆ-ն մյուսներին զսպվածության կոչ է անում։