Անիմաստ է ուտելիք տալ մեկին, ում հաջորդ օրը կսպանեն. Բորել

ԵՄ դիվանագիտության ղեկավար Ժոզեպ Բորելը, Բարսելոնայում Միջերկրածովյան միության ֆորումի հանդիպումից հետո, խոսելով պաղեստինա-իսրայելական հակամարտության գոտում իրավիճակի մասին, անիմաստ է համարել մարդասիրական օգնության տրամադրումը նրանց, որոնք վաղը կարող են սպանվել, հայտնում է ՌԻԱ Նովոստին։

Նրա խոսքով՝ միջազգային հանրության խնդիրն է մեղմել խաղաղ բնակիչների տառապանքը։

«Եվ դրա համար անհրաժեշտ է ավելացնել մարդասիրական օգնության ծավալը։ <...> Բայց իմաստ չունի ուտելիք տալ մեկին, ում հաջորդ օրը կսպանեն»,- ասել է նա։

Բորելը հավելել է, որ հրետակոծությունը պետք է դադարեցվի՝ նոր զոհերից խուսափելու համար։ Եվրոպական դիվանագիտության ղեկավարը հավելել է, որ մարդասիրական օգնությունն անհրաժեշտ է, բայց դա բավարար չէ։ Նա առաջնահերթ խնդիր է անվանել կողմերի միջեւ երկարաժամկետ հրադադարի համաձայնագրի կնքումը։

Բորելի խոսքով՝ ՀԱՄԱՍ-ը պետք է կորցնի ռազմական վերահսկողությունը Գազայի հատվածում։