Էրդողանը կոչ է արել պատասխանատվության ենթարկել Իսրայելին

Թուրքիան պատրաստ է ցանկացած պատասխանատվություն ստանձնել Գազայի հատվածում հակամարտության կարգավորման համար։ Այս մասին դեկտեմբերի 1-ին հայտարարել է Թուրքիայի նախագահ Ռեջեփ Թայիփ Էրդողանը։

«Թուրքիան պատրաստ է ստանձնել ցանկացած պատասխանատվություն [կարգավորման] գործընթացում»,- ասել է պետության ղեկավարը, նրա ելույթը հեռարձակել է TRT Haber հեռուստաալիքը։

Էրդողանը նաև ընդգծել է, որ Գազայում Իսրայելի կողմից իրականացված բռնությունները «հանցագործություն են մարդկության դեմ»։ Նրա խոսքով՝ մեղավորները պետք է պատասխանատվության ենթարկվեն միջազգային իրավունքի համաձայն։

Բացի այդ, նա հավելել է, որ Գազայի հատվածում տեղի ունեցած իրադարձությունները ցույց են տվել, որ անհրաժեշտ է ստեղծել անկախ պաղեստինյան պետություն՝ հիմնված 1967 թվականի սահմաններով, որի մայրաքաղաքը կլինի Արևելյան Երուսաղեմը:

«Որպես Թուրքիա՝ մենք պատրաստ ենք ցանկացած պատասխանատվություն ստանձնել դրա ստեղծման առումով»,- եզրափակել է Թուրքիայի ղեկավարը։