ՌԴ ՊՆ-ն 2024-ին ՀԱՊԿ-ի և ՇՀԿ-ի շրջանակներում չորս զորավարժություն կանցկացնի

2024 թվականին ռուս զինվորականները արտասահմանյան երկրների ստորաբաժանումների (այդ թվում՝ 4-ը՝ ՀԱՊԿ-ի և ՇՀԿ-ի կազմում) մասնակցությամբ մոտ 20 վարժանք կանցկացնեն։ Այս մասին ՌԴ պաշտպանության նախարարության ղեկավար Սերգեյ Շոյգուն հայտարարել է ռազմական գերատեսչությունում կայացած կոնֆերանսի ժամանակ, փոխանցում է ՏԱՍՍ-ը։

Նրա խոսքով՝ վերջնական արդյունքը կլինեն «Океан-2024» ռազմավարական զորավարժությունները՝ բոլոր տեսակի զորքերի ներգրավմամբ։

«Դեկտեմբերի 1-ին ռուսական բանակում սկսվեց նոր ուսումնական տարին։ Հիմնական ջանքերը նախատեսվում է կենտրոնացնել հատուկ գործողության խնդիրները լուծելու համար զորքերի պատրաստման վրա։ Հատուկ ռազմական գործողության գոտում կհամալրվեն 7 ժամանակակից պոլիգոններ, որոնցից երկուսի աշխատանքներն արդեն ավարտված են»,- նշել է նա։