ՀԱՄԱՍ-ի յուրաքանչյուր զինյալի սպանության դիմաց խաղաղ բնակչության շրջանում 2 զոհը «չափազանց դրական է»․ Իսրայելի ՊՆ

Գազայի հատվածում մարդասիրական կազմակերպությունների գործողությունները վնաս են հասցրել խաղաղ բնակիչներին անկլավում իսրայելական գործողության ֆոնին։ Այս մասին հայտարարել է Իսրայելի պաշտպանության բանակի պաշտոնական ներկայացուցիչ Ջոնաթան Կոնրիկուսը։

«Երբ Գազայի հյուսիսում մեր գործողություններից առաջ սկսեցինք խաղաղ բնակիչներին տարհանել մարտադաշտից, մենք զգուշացրինք՝ մեր զինվորների հայտնվելուց երկուսուկես շաբաթ առաջ... Պատասխանը, որ ստացանք (մարդասիրական կազմակերպություններից - խմբ. ) չափազանց անբավարար էր և ոչ օգտակար, և դա վնասեց խաղաղ բնակիչների պաշտպանությանը», - ասել է Կոնրիկուսը:

Նրա խոսքով՝ մարդասիրական կազմակերպությունները, Իսրայելին օգնելու փոխարեն, մինչ գործողությունների մեկնարկը զբաղված էին «քարոզչական արշավով»։

Կոնրիկուսը նաև կարծիք է հայտնել, որ ՄԱԿ-ի Պաղեստինի փախստականների օգնության և աշխատանքի գործակալությունը (UNRWA) պետք է վերանայի իր գործունեությունը Գազայի հատվածում:

Նա նաև հաստատել է իսրայելական կողմի՝ ավելի վաղ արված հայտարարությունը, որ ՀԱՄԱՍ-ի յուրաքանչյուր սպանված զինյալի դիմաց զոհվել է 2 պաղեստինցի խաղաղ բնակիչ։

Կոնրիկուսի կարծիքով՝ այս հարաբերակցությունը «չափազանց դրական» է՝ հաշվի առնելով քաղաքային պայմաններում ռազմական գործողությունների մարտահրավերները։