«Հունաստանը Թուրքիայի թշնամին չէ»․ Էրդողան

Թուրքիայի նախագահ Ռեջեփ Թայիփ Էրդողանը հարցազրույց է տվել հունական «Kathimerini» թերթին։ Խոսել է թուրք-հունական հարաբերությունների մասին՝ նշելով․ «Հունաստանի վարչապետ Կիրիակոս Միցոտակիս, բարեկամս, եթե դուք մեզ չսպառնաք, մենք էլ ձեզ չենք սպառնա։ Եկեք ամրապնդենք մեր երկու երկրների միջև վստահությունը», փոխանցում է Ermenihaber.am-ը։

Էրդողանը, հիշատակելով նախկինում Հունաստանին ուղղված «մի գիշեր հանկարծակի կգանք» արտահայտությանը, նշել է, որ խոսքը  վերաբերում է Թուրքիայի անվտանգությանը սպառնացող տարրերին։

Նշելով, որ Հունաստանը Թուրքիայի թշնամին չէ՝ Թուրքիայի նախագահը հայտարարել է․ «Մենք հարևաններ ենք, հարևաններ կմնանք և պետք է փոխադարձաբար հարգենք միմյանց իրավունքներն ու կենսական շահերը։ Հույն ժողովուրդը, ում հետ մենք ապրել ենք դարեր շարունակ, լավ գիտի, թե որքան ջերմ ենք, երբ ձեռք ենք մեկնում»։

Ի հավելումն Էրդողանը նշել է, որ նրանք (իմա՝ հույները) շատ լավ գիտեն թուրքական մշակույթում առկա հանդուրժողականությունը և անկեղծությունը։

«Մենք ցանկանում ենք փոխըմբռման հիման վրա բարելավել մեր հարաբերությունները  և խաղաղ ապրել այս տարածաշրջանում։ Մենք մի երկիր ենք, որը բազմիցս ապացուցել է, որ ինչ ասում է, խոսքի համար չի ասում։ Արևմտյան լրատվամիջոցները փորձում են աղավաղել իմ խոսքերը»,- նշել է Էրդողանը։

Անդրադառնալով երկու երկրների միջև էներգետիկ ոլորտում համագործակցության ներուժին՝ Թուրքիայի նախագահը հայտնել է, որ Միջերկրկարական ծովում համագործակցության ներուժ կա, իսկ Էգեյան և Արևելյան Միջերկրական ծովերում էներգետիկ պաշարների առկայության մասին կարելի է պարզել գիտական հետազոտությունների արդյունքում և դրա վերաբերյալ խոստումնալից ուսումնասիրություններ են կատարվել։

Մատնանշելով նաև Միջերկրական և Էգեյան ծովի բնական պաշարների հարուստ ավազանները՝ Էրդողանը հայտնել է, որ միջազգային կոնյուկտուրայում էներգետիկ անվտանգության ապահովումը և պահպանումը ռազմավարական էական խնդիր է դարձել։