Ռուսաստանը փորձում է ապակայունացնել իրավիճակը Մոլդովայում. Սանդու

Մոլդովայի նախագահ Մայա Սանդուն Ռուսաստանին մեղադրել է 2024 թվականի նոյեմբերին սպասվող նախագահական ընտրություններից առաջ հանրապետությունում իրավիճակը ապակայունացնելու ծրագրերի մեջ, գրում է ՏԱՍՍ-ը։

«Կարծում ենք, որ Ռուսաստանի Դաշնությունը կշարունակի փորձել ապակայունացնել իրավիճակը այստեղ: Ամենայն հավանականությամբ, դրանք կսկսվեն գարնանը: Այն մարդկանց, ովքեր այստեղ են, կօգտագործեն, մարտավարությունը կարող է փոխվել: Պետք է ուսումնասիրել ՏԻՄ ընտրությունների դասերը, վերլուծել դրանք և միջոցներ ձեռնարկել քաղաքացիների ձայները և ժողովրդավարական ընտրությունները պաշտպանելու համար»,- ասել է Սանդուն PRO-TV-ին տված հարցազրույցում։

Մոլդովայի իշխանությունները ճգնաժամ են ապրում, քանի որ 2022 թվականից հանրապետությունում տեղի են ունենում ընդդիմության զանգվածային բողոքի ցույցեր՝ պահանջելով նախագահի և «Գործողություն և համերաշխություն» կուսակցության կողմից ձևավորված կառավարության հրաժարականը։ Ցուցարարները նրանց պատասխանատու են համարում երկրում գների աճի և աղքատության մակարդակի համար: Ի պատասխան՝ իշխանությունները մեղադրեցին ընդդիմությանը հեղաշրջում նախապատրաստելու մեջ, քրեական գործեր հարուցեցին ցուցարարների դեմ, փակեցին հեռուստաալիքներն ու տեղեկատվական պորտալները, որոնք հարթակ էին ապահովում ընդդիմության համար։