Ճապոնիայում առաջին անգամ խոզ են բուծել, որի օրգանները կարելի է փոխպատվաստել մարդկանց

Ճապոնիայում առաջին անգամ հաջողությամբ բուծվել է գենետիկորեն ձևափոխված խոզ, որի օրգանները կարող են փոխպատվաստվել մարդկանց։ Այս մասին հայտարարել է Meiji համալսարանի հովանու ներքո գործող PorMedTec ընկերությունը։

Ի սկզբանե, գենետիկորեն ձևափոխված խոզերի աճեցման համապատասխան տեխնոլոգիա՝ քսենոտրանսպլանտացիայի նպատակով (կենդանիների օրգանների փոխպատվաստում մարդու օրգանիզմ - խմբ.) մշակվել է ԱՄՆ-ում՝ տեղական բիոտեխնոլոգիական ընկերության կողմից։

Ճապոնացի մասնագետները կարողացել են հաջողությամբ կլոնավորել խոճկորին՝ օգտագործելով ԱՄՆ-ից ներկրված բջիջները։ Ընդգծվում է, որ սա առաջին դեպքն է, երբ Ճապոնիայում գենետիկորեն ձևափոխված խոզ է ծնվել, որի օրգանները հետագայում նախատեսվում է փոխպատվաստել մարդկանց։

ԱՄՆ-ում 2023 թվականի աշնանը աշխարհում երկրորդ վիրահատությունն է իրականացվել՝ գենետիկորեն ձևափոխված խոզի սիրտը վերջնական փուլում սրտի անբավարարություն ունեցող մարդուն փոխպատվաստելու համար։ Վիրահատությունը նրան թույլ է տվել ապրել ևս վեց շաբաթ, սակայն արդյունքում՝ 58-ամյա տղամարդը մահացել է։ Մերիլենդի համալսարանի մասնագետները, ովքեր կատարել են վիրահատությունը, խոստովանել են, որ փոխպատվաստված սիրտն ի վերջո սկսել է չգործել։

Այսպես կոչված «քսենոտրանսպլանտացիան» վաղուց ընդհատվել է այն պատճառով, որ իմունային համակարգը մերժում է օտար հյուսվածքը: Կենսաբաններն այս խնդրի լուծմանը մոտեցել են միայն վերջին տասնամյակի սկզբին՝ գենետիկ ինժեներիայի շնորհիվ։ Միևնույն ժամանակ, համապատասխան հետազոտություններն ուղեկցվում են բազմաթիվ բանավեճերով, առաջին հերթին՝ էթիկական։