Հորդառատ անձրեւները մեծ վնասներ են պատճառել նաեւ սահմանամերձ Մովսես գյուղի ճանապարհներին

Հորդառատ անձրեւները բազմաթիվ խնդիրներ են առաջացրել նաեւ սահմանամերձ Մովսես գյուղին, սակայն համապատասխան պետական մարմիններն անտեսում են։ Ընդ որում՝ մեծ վնաս է հասցվել բերքին, ճանապարհներին, որոնց վրա առաջացել են փոսեր, սակայն գոնե ճանապահները վերականգնելու ուղղությամբ քայլեր չեն արվում։

«Սահմանամերձ գյուղերը բարձիթողի վիճակում թողնել չի կարելի»,- ասաց ահազանգած՝ Մովսես գյուղի բնակչուհին, Քնար տատը։

Գյուղում հասկանում են, թե Լոռիի ու Տավուշի որոշ բնակավայրերին ջրհեղեղի պատճառած վնասները անհամեմատ մեծ են, բայց սահմանամերձ գյուղերի խնդիրներն անտեսելը՝ հատկապես, երբ թշնամու դիրքերն այդքան մոտեցել են, կարող է վատ հետեւանքներ ունենալ։

«Մեզ չմոռանաք, քե մատաղ, հիմա, որ լրագրողներն էլ մոռանան՝ պաշտոնյաներն էլ կմոռանան հաստատ, մեր հարցերը բարձրացրեք, ամեն գործ իր տեղն ունի, մեկը մեկով չպատճառաբանեն հանկարծ», - ասաց Քնար տատը՝ նշելով, որ ճանապարհներին առաջացած հսկայական փոսերի պատճառով ավտոմեքենաների երթեւակությունը բարդացել է։

Տարեց բնակչուհին փաստում է՝ իրենց բոլոր ճանապարհները նաև ռազմավարական նշանակություն ունեն՝ ոչ միայն միջհամայնքայինը, այլև գյուղինը։

«Եթե աղետից տուժած ծանր վիճակում հայտնված հատվածներում հնարավոր է նաև դիմել ու միջազգային օգնություններով նորոգել, ապա գյուղերի ճանապարհները կարող են այդ նպատակի համար նախատեսված համայնքային գումարներով անել»,- ասաց բնակչուհին։