Կրկին իշխանական փիար-խումբը երեւանյան փողոցներում, կամ «թագավորը մե՜րկ է»

Նիկոլը եւ Աննան դուրս են եկել հանրության մեջ։ Մեկը որոշել է հեծանիվ քշել, մյուսը՝ ժպիտը դեմքին, անհոգ զբոսնում է երեւանյան փողոցներում։ «Մենք ձեզ հետ ենք, մենք ժողովրդի հետ ենք, եւ չկա այն ուժը, որը կստիպի մեզ թաքնվել ամառանոցում կամ բունկերում»,-ասես ուզում են ասել այս «հերոսները»։   

Դժվար է ասել, որ հեծանվով այդ տեսանյութից հետո երեւանցիները մասսայաբար կնետվեն՝ զբաղվելու «առողջ ապրելակերպով», կամ Աննայի ժպիտը հմայել է երեւանաբնակներին։ Ամենայն հավանականությամբ, շոուի հեղինակները ցանկանում էին ցույց տալ, որ «իրենց սրտի վարչապետը» եւ նրա «կեսը» կարող են ազատ տեղաշարժվել քաղաքով մեկ եւ փողոց դուրս եկած Սրբազանի գլխավորությամբ ժողովրդի մի ստվար զանգվածը, որը դժգոհ է իշխանության վարած քաղաքականությունից, ամենեւին էլ դրան խոչընդոտ չի կարող լինել։ 

Բայց արդյո՞ք այդ փիար-կամպանիան տվել է իր արդյունքները։ «Ժանտախտի ժամանակ քեֆը» միշտ հակառակ արդյունքն է տալիս։ Դատելով սոցցանցերում քաղաքացիների մեկնաբանություններից՝ դա ավելի է զայրացրել մարդկանց։ Նրանց  մեծամասնությանը ավելի շուտ  հետաքրքրում է՝ իսկ ի՞նչ է հետագայում լինելու ցավոտ սահմանազատումից եւ սահմանագծումից հետո, եւ, ընդհանրապես, մեր երկրի ճակատագրի հետ։

Առավոտյան շուտ դատարկ երեւանյան փողոցներով հեծանիվ քշելը այդ կարեւորագույն հարցերի պատասխանը չի կարող տալ։ Եւ չի էլ համոզում, որ վարչապետը եւ սեւ ակնոցներով դեմքի կեսը ծածկած նրա կինը կարող են ազատ շրջել քաղաքում։
Ակամա հիշում ես դանիացի գրող Հանս Քրիստիան Անդերսենի հեքիաթը, երբ թագավորը դուրս է գալիս փողոց՝ «անտեսանելի զգեստով» եւ մի տղա հետեւից բղավում է. «Թագավորը մե՜րկ է։»

Բագրատ Սրբազանի մարզային հանդիպումները, Երեւանում քաղաքացիերի հետ ջերմ ողջագուրման տեսարանները ստիպել են վարչապետ Փաշինյանին բեմադրել նույնանման իրավիճակներ: Սակայն քանի որ կա տագնապ ու վախ եւ  անկանխատեսելի են անծանոթ մարդիկ, բարդ է տեսարաններ ստեղծել, ուստի իշխանական քարոզչամեքենան անցել է  կեղծ միջոցների։

Միայնակ «1 դերասանով մի ամբողջ կոլաժ» ստանալու լուծում է գտել իշխանական փիար-խումբը, Փաշինյանը լուսաբացին թիկնազորով դուրս է գալիս կառավարական ամառանոցից եւ դիպուկահարների հսկողության տակ վայրկյանով կադրեր ստանալու ջանքեր է գործադրում իբր ապացուցելու, որ ազատ անկաշկանդ կարողանում է քայլել Երեւանի փողոցներում, նույնը կինն է բեմադրում` կտոր-կտոր մոնտաժված կադրերով, որպեսզի մեսսիջ փոխանցի, թե իրենք հասարակության պարսավանքի չեն ենթարկվում եւ  Փաշինյանի ընտանիքը կարողանում է զբոսնել հանրային վայրերում ու ջերմ հանդիպումներ ունենալ զոհվածի մոր կամ զվարճասեր քաղաքացիների հետ ռեստորաններում:

Սրբազան պայքարի ընդունելության ջերմ դրվագներից ակնհայտորեն նեղսրտում է Նիկոլ Փաշինյանը, ով իր քայլարշավից հետո կարողացել էր  կարճ ժամանակով միակ իշխանավորը դառնալ, ով ամենուր սեր ու ջերմություն է վայելում փողոցներում ընդունելությունների ժամանակ ու հանրային վայրերում։