Մենք ձեռքերը ծալած չենք նստի. Իսրայելը պատրաստ է Լիբանանի հետ սահմանին ռազմական գործողություններ սկսել

Իսրայելի վարչապետ Բենիամին Նեթանյահուն հայտարարել է, որ պատրաստ է «շատ ինտենսիվ գործողությունների» երկրի հյուսիսում, որտեղ Իսրայելը սահմանակից է Լիբանանին։ Նեթանյահուի հայտարարությունը հնչել է Լիբանանի հետ սահմանի մոտ գտնվող Կիրյաթ Շմոնա քաղաք կատարած այցի ժամանակ, որտեղ անտառային հրդեհներ են բռնկվել լիբանանյան «Հեզբոլլահ» խմբավորման գնդակոծությունից հետո, գրում է Jerusalem Post-ը։

«Ամեն ոք, ով կարծում է, որ կարող է մեզ վնասել, մինչ մենք ձեռքերը ծալած նստած ենք, մեծ սխալ է թույլ տալիս: Մենք պատրաստ ենք շատ ինտենսիվ գործողությունների հյուսիսում։ Այսպես թե այնպես մենք կվերականգնենք անվտանգությունը հյուսիսում»,- ասել է Իսրայելի վարչապետը։

Նախօրեին՝ հունիսի 4-ին, Իսրայելի պաշտպանության բանակի գլխավոր շտաբի պետ Հերզի Հալևին ասել էր, որ զինվորականները մոտ են «Հեզբոլլահի» պարբերական հարձակումներին պատասխանելու որոշում կայացնելուն։

«Մենք հարձակվում ենք արդեն ութ ամիս, և «Հեզբոլլահը» վճարում է շատ, շատ թանկ գին: Վերջին օրերին այն ավելացրել է իր ուժերը, և շատ զգույշ նախապատրաստվելուց հետո մենք պատրաստ ենք հարձակման անցնել հյուսիսում»,- ասել է Հալևին։

Լիբանանի հետ սահմանին իրավիճակի սրման ֆոնին Իսրայելի կառավարությունը թույլ է տվել, որ պահեստայինների թիվը, որոնց անհրաժեշտության դեպքում Իսրայելը կարող է կանչել, 300 հազարից հասցնել 350 հազարի։ Times of Israel-ի ռազմական աղբյուրները նշում են, որ դա պայմանավորված է Գազայի հատվածում, այլ ոչ թե հյուսիսային Իսրայելում գործողությունների ընդլայնմամբ:

Իսրայելն ու «Հեզբոլլահը» հարվածներ են փոխանակում 2023 թվականի աշնանից, երբ արմատական ​​պաղեստինյան ՀԱՄԱՍ շարժման զինյալները հարձակվեցին Իսրայելի վրա։ Գնդակոծության արդյունքում ավելի քան 53 հազար իսրայելցի է տարհանվել երկրի հյուսիսից, CNN-ին հայտնել են Իսրայելի պաշտպանության բանակից։ Լիբանանի առողջապահության նախարարության տվյալներով՝ հակամարտության սկզբից ի վեր ավելի քան 94 հազար լիբանանցի լքել է Իսրայելի հետ սահմանին մոտ գտնվող շրջաններն ու քաղաքները։