Սա աննախադեպ հարձակում էր․ ի՞նչ է պատմում Երուսաղեմում բնակվող մեր հայրենակիցը՝ երեկվա հրթիռակոծությունների մասին (տեսանյութ)

Սա աննախադեպ հարձակում էր։ Առաջին անգամն էր, որ բնակիչներին հաղորդագրությունների միջոցով էին տեղեկացնում հրթիռակոծության ու օդային տագնապի մասին։ ԼՈՒՐԵՐ․com-ի հետ զրույցում այս մասին պատմեց Երուսաղեմում բնակվող Սեդրակ Բալյանն՝ անդրադառնալով երեկ գիշերն Իրանի՝ Իսրայելի ուղղությամբ արձակած հրթիռային հարվածների մասին։

Մեկ ժամում, ըստ իրանական ԶԼՄ-ների, առնվազն 400 բալիստիկ հրթիռ է արձակվել իսրայելական ռազմական օբյեկտների ուղղությամբ ընդ որում հաջող կերպով Իրանական զինուժը 80 տոկոս ճշգրտությամբ խոցել է իսրայելական թիրախները։ Հրթիռակոծությունից հետո իրանական ԶԼՄ-ները գրեցին, որ հրթիռները խոցել են Իսրայելի Աշկելոն շրջանում գտնվող գազային հարթակները և հարվածել են իսրայելական Նևաթիմ ավիաբազային: Մեր հայրենակից Բալյանի նկարագրությամբ՝ օդային տագնապից հետո միանգամից դատարկվել են փողոցները։ Ասում է՝ հազիվ եմ հասցրել իմ տուն մտնել և նկատել են , թե ինչպես են մարդկանց տարհանել բնակարաններից իջեցրել ապաստարաններ։ Պատմեց, որ օդում, անզեն աչքով անգամ, տեսել են Իրանից դեպի Իսրայել թռչող հրթիռները։

«Աշխատանքի էի, երբ հեռախոսիս հաղորդագրություն ստացա՝ մտեք ապաստարաններն ու թաքնվեք։ Դրանից հետո օդային տագնապի ձայներ լսվեցին, փողոցում մի կերպ պատսպարվեցի»,- ԼՈՒՐԵՐ․com-ի հետ զրույցում ասաց Երուսաղեմում բնակվող Սեդրակ Բալյանը։

Այս պահի դրությամբ Երուսաղեմում ու մոտակա հատվածներում, Բալյանի խոսքով, խաղաղ է, նոր հրթիռակոծության մասին դեռևս նախազգուշացում չկա։ Հայկական համայնքում տիրող իրավիճակի մասին խոսելով մեր զրուցակիցը նշեց՝ ցավոք, տեղի հայերն արդեն սովոր են նման դեպքերին։ Բալյանն ընդգծեց՝ Իսրայելում մարդիկ անորոշության մեջ են ապրում․ չգիտեն՝ լքե՞ն երկիրը, թե՞ ոչ։ «Ապրիլ ամսին ևս նմանատիպ իրավիճակ էր ստեղծվել, սակայն, այդ ժամանակ պայթյունների քանակն անհամեմատ քիչ էր, իսկ այս անգամվա հրթիռակոծությունները Երուսաղեմին ավելի մոտիկ էին» ,- շեշտեց նա։

«Մենք մշտապես կապի մեջ ենք պատրիարքության հետ։ Երբ սկսվեց պաղեստինաիսրայելական պատերազմը, համայնքն ու պատրիարքարանը խորհրդակցեցին ու վճռեցին՝ մարդկանց համար ապահով կացարաններ գտնեն, որ եթե ինչ-որ բնան էլ լինի, մեր հայրենակիցներին ապահով տեղ տրամադրվի» ,- ասաց նա։

Նշենք, որ այս ամենի համատեքստում իսրայելական բանակը խոստացել է վրեժխնդիր լինել Իրանից իր տարածքի վրա հարձակումների համար։ ԶԼՄ-ները գրում են, որ Իսրայելի հրթիռակոծումն իրականացվել է Իրանի գերագույն առաջնորդ այաթոլլա Ալի Խամենեիի հրահանգով։

Սիլվի Մուրադյան