Կոլագենով հավելումները կնճիռներից պաշտպանում են սովորական սպիտակուցից ոչ ավելի լավ. Daily Mail

Սովորական սպիտակուցային հավելումները կարող են կանխել կնճիռների առաջացումը նույնքան արդյունավետ, որքան եւ կոլագենը։ Այս մասին Daily Mail պարբերականին պատմել է դոկտոր Դեւիդ Քլենսը (Լանքասթերի համալսարանի ծերացման կենսաբանության հետազոտող, բիոգերոնտոլոգ)։

Գիտնականը նշել է, որ կոլագենը օրգանիզմում կարեւոր կառուցվածքային սպիտակուց է, որը նպաստում է մաշկի, կռճիկների եւ ոսկորների առաձգականությանը։ Այդ սպիտակուցի մակարդակն օրգանիզմում նվազում է տարիքի հետ, ուստի շատ մարդիկ ընդունում են հավելումներ հյուսվածքների երիտասարդությանն աջակցելու համար։

Որոշ վաղ հետազոտություններ ցույց են տվել, որ կոլագենն իսկապես նպաստում է մաշկի առաձգականության ու խոնավության բարձրացմանը եւ, գուցե, ամրացնում է եղունգներն ու մազերը։ Սակայն, Քլենսի կարծիքով, նման փորձերի արդյունքները կարող են ստույգ չլինել։ Բանն այն է, որ առայժմ չի իրականացվել հետազոտություն, որում կոլագենի ընդունման էֆեկտը կհամեմատվեր մյուս սպիտակուցային հավելումների էֆեկտի հետ։ Բարձր է հավանականությունը, որ սովորական սպիտակուցը նման օգտակար հատկություններ ունի։

Բիոգերոնտոլոգն ավելացրել է, որ կնճիռների կանխման համար ավելի հեշտ եւ էժան կլինի օգտվել մաշկի քսուքից։ Դրա կիրառումն արդյունք կտա, որը նման է կոլագենային հավելումների ազդեցությանը, ինչպես նաեւ «չի հարվածի» բյուջեին։

News.am