Արքայազն Հարրին կարծում է, որ սմարթֆոնները գողանում են մանկությունը

Սմարթֆոնները գողանում են մանկությունը, կարծում է արքայազն Հարրին: Հոգեկան առողջության համաշխարհային օրը Սասեքսի դուքսը միացել է «The Anxious Generation» (Անհանգիստ սերունդ) գրքի հեղինակ և սոցիալական հոգեբան Ջոնաթան Հայդտին՝ սմարթֆոնների, սոցիալական մեդիայի և երիտասարդների վրա դրանց ազդեցության մասին զրույցի համար:

Արքայազն Հարրին սկսել է զրույցը` հայտարարելով, որ «շատ դեպքերում սմարթֆոնը գողանում է մանկությունը»:

Հայդտը համաձայնել է այդ դիտարկման հետ՝ նշելով, որ մարդիկ, որոնք ծնվել են 1995-ից հետո և ապրում են անգլիախոս երկրներում, սեռական հասունության մեջ են մտնում անհանգստության, դեպրեսիայի, ինքնավնասման և ինքնասպանության բարձր ցուցանիշներով՝ որպես սմարթֆոնի օգտագործման անմիջական հետևանք:

«Տեխնոլոգիական ընկերությունները մեզ բարդ դրության մեջ են դնում, իսկ հետո փորձում են մեզ մեղադրել իրենց արածի համար», - ավելացրել է Հայդտը:

Մինչ զրույցը շարունակվում էր, Սասեքսի դուքսը, որն ինքը երկու երեխաների հայր է, նշել է, որ ծնողները ցանկանում են, որ իրենց երեխաները հեռախոս ունենան, հատկապես դպրոցում արտակարգ իրավիճակների դեպքում:

«Տվեք նրանց հեռախոս, բայց մի տվեք սուպերհամակարգիչ, որը միացված է ամբողջ աշխարհին», - ասել է Հայդտը:

Հարրին նաև անդրադարձել է տարածված թյուր կարծիքին, որ Instagram-ը, TikTok-ը և Snapchat-ը «փրկօղակներ» են, իսկ սոցիալական ցանցերը «տալիս են ելք և լրացուցիչ ռեսուրս են»: Հայդտը բացատրել է, որ դա սովորական «առասպել» է՝ նշելով, որ երեխաների համար ավելի շատ կապված զգալու լուծումը հեռախոսները վայր դնելն ու անձամբ շփվելն է:

«Հետազոտությունը, կարծում եմ, շատ պարզ է. Երբ երեխաները ունեն լավագույն ընկեր, կամ ընկերների փոքր խումբ, նրանք հակված են լավ արդյունքների»,-ասել է Հայդտը: «Երբ երեխաները չունեն մտերիմ ընկեր կամ մտերիմների խումբ, նրանց հաջողության հասնելու հավանականությունը շատ ավելի քիչ է: Երբ ունես 300 կոնտակտ, ոչ մեկի համար ժամանակ չես ունենում»:

«2024 թվականը, շրջադարձային է: Սարսափելի բաներ են պատահել մեր երեխաների հետ, մենք դա տեսնում ենք հիմա... Ես չեմ ուզում մեղադրել որևէ ծնողի, քանի որ մենք դա չգիտեինք 10 տարի առաջ», - եզրափակել է Հայդտը:

աղբյուր՝ style.news.am