Հյուսիսային Կորեան բացի զենքից՝ նաև մարդկային ուժ է տրամադրում Ռուսաստանին. Զելենսկի (տեսանյութ)

Ուկրաինայի նախագահ Վոլոդիմիր Զելենսկին հայտարարել է, որ Հյուսիսային Կորեայի ռեժիմը ոչ միայն զենք, այլ նաև մարդկային ուժ է  է փոխանցում Ռուսաստանին։

«Մենք տեսնում ենք, որ դաշինքը Ռուսաստանի և այնպիսի ռեժիմների միջև, ինչպիսին Հյուսիսային Կորեան է, աճում է։ Այլևս խոսքը միայն զենքի տեղափոխման մասին չէ: Խոսքն իրականում Հյուսիսային Կորեայից մարդկանց օկուպացիոն ռազմական ուժեր տեղափոխելու մասին է։ Ակնհայտ է, որ նման պայմաններում մեր հարաբերությունները գործընկերների հետ պետք է զարգացնել։ Ճակատն ավելի մեծ աջակցության կարիք ունի», - ասել է Զելենսկին տեսաուղերձում։

Հանդիպման ընթացքում Պուտինը և Կիմ Չեն Ընը ստորագրել են «համապարփակ ռազմավարական գործընկերության» համաձայնագիր՝ ձգտելով ընդլայնել տնտեսական և ռազմական համագործակցությունը և ամրապնդել «միասնական ճակատը» Վաշինգտոնի դեմ։ Պայմանագրի համաձայն՝ Ռուսաստանի Դաշնությունը և ԿԺԴՀ-ն պարտավորվել են «փոխօգնություն» ցուցաբերել երկրներից մեկի դեմ «ագրեսիայի» դեպքում։

Հոկտեմբերի 4-ին The Times-ը, վկայակոչելով արևմտյան հետախուզությունը, հայտնել է, որ Ռուսաստանի կողմից օգտագործվող մոտ երեք միլիոն հրետանու կեսը Ռուսաստանին հասնում է Հյուսիսային Կորեայից:

Հոկտեմբերի 8-ին Yonhap լրատվական գործակալությունը հրապարակել է Հարավային Կորեայի պաշտպանության նախարար Կիմ Յոնգ Հյունի հայտարարությունը, որում ասվում է, որ ԿԺԴՀ-ն, ամենայն հավանականությամբ, կուղարկի իր զինուժը Ուկրաինա՝ աջակցելու Ռուսաստանին: