Ավիաընկերությունները զգուշացնում են սնանկության ռիսկերի մասին

Ավիաընկերությունները նախազգուշացրել են լիզինգային պարտքերի պատճառով սնանկության ռիսկերի մասին։

Լիզինգային ինքնաթիռների հետ կապված խնդիրները կարող են ազդել երեք տասնյակ ավիաընկերությունների վրա, որոնք ապահովում են Ռուսաստանի ներսում ուղևորափոխադրումների 26%-ը, այս մասին հայտնում է «Իզվեստիա» պարբերականը։

Պարբերականը նշում է, որ պատժամիջոցների սահմանմամբ մի շարք ավիաընկերություններ դադարել են լիզինգային վճարումներ փոխանցել օտարերկրյա ինքնաթիռների համար։ Պետությունը նախատեսում է դուրս գրել այդ պարտքերը, բայց եթե դա տեղի ունենա, 2025 թվականին փոխադրողներին այդ գումարներից 25% եկամտահարկ կգանձվի։ 

Օդային տրանսպորտի շահագործողների ասոցիացիան (AEVT) կարծում է, որ հարկը զգալիորեն կվնասի ռուսական ավիաընկերությունների ֆինանսական վիճակին, նույնիսկ կարող է հանգեցնել դրանց սնանկացմանը: Այսօր AEVT-ն առաջարկներ է մշակում ավիաընկերությունների համար բացասական հետևանքները նվազագույնի հասցնելու և ապագայում դրանց կայուն գործունեությունն ապահովելու համար: Մինչ այդ «Շերեմետևո» օդանավակայանը և «Աերոֆլոտ» ընկերությունները համատեղ մշակել են նախաթռիչքային ընթացակարգերն արագացնելու միջոցառումների ցանկ:  

     Թարգմ․ Ժաննա Պողոսյան