Ալիևը և ՄԹ վարչապետը քննարկել են Բաքվի և Երևանի միջև խաղաղության գործընթացը

Ադրբեջանի նախագահ Իլհամ Ալիևը նոյեմբերի 12-ին հանդիպել է Միացյալ Թագավորության վարչապետ Քիր Սթարմերի հետ COP29 համաժողովի շրջանակներում, հաղորդում են ադրբեջանական լրատվամիջոցները։

Հաղորդվում է, որ Սթարմերը հետաքրքրվել է Հայաստանի և Ադրբեջանի միջև բանակցային գործընթացով։

Ալիևն ասել է, որ ներկայումս կողմերի միջև շարունակվում են բանակցությունները խաղաղության պայմանագրի շուրջ։ «Համաձայնագրի տեքստի մի զգալի մասն արդեն համաձայնեցված է, լուրջ առաջընթաց կա Հայաստանի և Ադրբեջանի միջև սահմանագծման և սահմանազատման հարցում, իրականացվել է ոչ միայն դեմարկացիա, այլ նաև ավելի քան 12 կմ երկարությամբ սահմանի դելիմիտացիա, և հանձնաժողովի վերջին նիստում այս գործընթացի առաջխաղացման պայմանավորվածություն է ձեռք բերվել»։

Միաժամանակ, Ալիևը հայտարարել է «ՀՀ Սահմանադրությունից Ադրբեջանի նկատմամբ տարածքային պահանջները բացառելու կարևորության մասին»: