Ֆրանսիան անպատասխան չի թողնի իր և Եվրոպայի նկատմամբ Ադրբեջանի հարձակումները. ֆրանսիացի նախարար

COP29-ի բացման արարողության ժամանակ Ֆրանսիայի և Եվրոպայի հասցեին նախագահ Ալիևի արտահայտություններն անընդունելի են։ Մեր երկրի, նրա ինստիտուտների և տարածքների վրա ուղղակի հարձակումներն արդարացում չունեն։ Այս մասին հայտարարել է Ֆրանսիայի էկոլոգիական անցման հարցերով նախարար Անյես Պանիե-Ռյունաշեն։

«Ադրբեջանն օգտագործում է կլիմայի փոփոխության դեմ պայքարը աղաղակող անձնական շահի համար։ Դա «Կլիմայի փոփոխության մասին» շրջանակային կոնվենցիայի վարքագծի կոպիտ խախտում է, և դրանք անպատասխան չեն մնա:

Հանրապետության նախագահի և վարչապետի հետ քննարկման և պայմանավորվածության արդյունքում ես չեմ մեկնի Բաքու»,– նշել է նա։

Ֆրանսիացի նախարարի խոսքով՝ զավեշտալի է, որ ռեպրեսիվ և ազատության դեմ հանդես եկող Ադրբեջանի վարչակարգը մարդու իրավունքների վերաբերյալ դասեր է տալիս։