ԲԴԽ նախագահի հրաժարականի պահանջը միջամտություն է դատական իշխանության անկախությանը․ Մարուքյան

Վերջին շրջանում Բարձրագույն դատական խորհրդի նախագահի հանդիպումները որոշ շրջանակներում քննադատության և անգամ հրաժարականը պահանջելու առարկա են դարձել։ Այդ մասին գրել է «Լուսավոր Հայաստան» կուսակցության ղեկավար Էդմոն Մարուքյանը․  

«Բարձրագույն դատական խորհրդի  նախագահ Արթուր Աթաբեկյանը վերջին շրջանում մի շարք հանդիպումներ է ունեցել։ Նա մասնակցել է ԱՊՀ գերագույն դատարանների նախագահների խորհրդի առաջին նիստին, ընդունել է Ղազախստանի դեսպանին, ինչպես նաև հանդիպել է Հայաստանում Ռուսաստանի Դաշնության Արտակարգ և լիազոր դեսպան Սերգեյ Կոպիրկինին։ Ապագայում հանդիպումներ կարող է ունենալ ԱՄՆ, ԵՄ դեսպանների հետ և դրանից նույնպես պե՞տք է հայոց պատմությունը սարքել:

ՀՀ Սահմանադրության 173-րդ հոդվածը հստակ ամրագրում է, որ ԲԴԽ-ն անկախ մարմին է, որը գործում է դատական համակարգի անկախությունն ապահովելու նպատակով։ Նույն սկզբունքը ամրագրված է նաև «Դատական օրենսգիրք» սահմանադրական օրենքի 79-րդ հոդվածում։

Հարկ է ընդգծել, որ Բարձրագույն դատական խորհրդի նախագահն կաշկանդված չէ հանդիպել Հայաստանի Հանրապետությունում հավատարմագրված ցանկացած դեսպանի, ինչպես նաև միջազգային կազմակերպությունների ներկայացուցիչների հետ։

Եվ այն հայտարարությունները, թե անընդունելի են նման հանդիպումները ԲԴԽ նախագահի կողմից և հրաժարականի պահանջը, կարող են դիտարկվել որպես միջամտություն ԲԴԽ-ի և դատական իշխանության անկախությանը»,- նշել է նա։