Կալանավորվել է Ջրային կոմիտեի նախկին նախագահ Վահագն Գևորգյանը

Ջրային կոմիտեի արդեն նախկին նախագահ, Աբովյանի նախկին քաղաքապետ Վահագն Գևորգյանը երեկ ձերբակալվել է, ապա՝ կալանավորվել: Գործի շրջանակում նա ունի մեղադրյալի կարգավիճակ և նրա նկատմամբ որպես խափանման միջոց կիրառվել է տնային կալանք` 2 ամիս ժամկետով: 

Ի պատասխան Euromedia24-ի հարցման՝ Հակակոռուպցիոն կոմիտեի մամուլի խոսնակ Մարինա Օհանջանյանը հայտնեց, որ Վահագն Գևորգյանի վերաբերյալ քրեական վարույթը քննվում է Հակակոռուպցիոն կոմիտեում, գործով կան նաև այլ մեղադրյալներ, սակայն մանրամասներ չհայտնեց՝ նախաքննության շահերից ելնելով։ 

Հիշեցնենք, որ ընդամենը օրեր առաջ՝ դեկտեմբերի 20-ին, Նիկոլ Փաշինյանը Վահագն Գևորգյանին ազատել էր  Ջրային կոմիտեի նախագահի պաշտոնից:

Նշենք, որ Վահագն Գևորգյանին 2020 թվականին մեղադրանք էր առաջադրվել այն բանի համար, որ նա դրսևորել է պաշտոնեական անփութություն և Աբովյան համայնքի ղեկավար եղած ժամանակահատվածում թույլատրել է զավթել 2240 մետր մակերեսով հողամաս։ 

Սոնա Հարությունյան