Քանի ընդհանուր ուժի հարաբերակցությունը թույլ է տալիս՝ Ադրբեջանը հա կհոխորտա․ Արտակ Դավթյան

Ես այդքան տեղեկատվություն չունեմ, որպեսզի կարողանամ ասել պատերազմի վտանգ կա՞, թե՞ ոչ։ Euromedia24-ի հետ զրույցում նման տեսակետ հայտնեց Փաշինյանի իշխանության օրոք Գլխավոր շտաբի պետ նշանակված, ապա պաշտոնից ազատված Արտակ Դավթյանը՝ մեկնաբանելով երեկ Ալիևի արած հայտարարություններն ու հնարավոր պատերազմի վտանգը։

«Իհարկե, քանի ընդհանուր ուժի հարաբերակցությունը թույլ է տալիս, Ադրբեջանը հա կհոխորտա։ Սակայն, ես այդքան տեղեկատվություն չունեմ, որպեսզի կարողանամ ասել պատերազմի վտանգ կա՞, թե՞ ոչ»,- նշեց նա։

Մեր հարցին՝ այս դեպքում ի՞նչ պետք է անի մեր երկրի ղեկավարը, երբ թշնամի երկրի նախագահը սպառնալիքներ է հնչեցնում, Դավթյանը պատասխանեց․ «Ես չգիտեմ, երկրի ղեկավարն ինքն է և ինքն է որոշում անվտանգության նիստ հրավիրել, թե ոչ» - եզրափակեց Արտակ Դավթյանը։

Նշենք, որ երեկ Ադրբեջանի նախագահ Իլհամ Ալիևը հարցազրույց է տվել ադրբեջանական լրատվամիջոցներին, որի ժամանակ կրկին սպառնացել է Հայաստանին, որ «Զանգեզուրի միջանցքը» պետք է բացվի և կբացվի։ Դրան հաջորդել է նաև մեկ այլ հայտարարություն, որտեղ բռնապետ Ալիևը անկախ հայկական պետությունը որակել է որպես ֆաշիստական պետություն․ «ՀՀ-ն իբրև թե սպառնալիքի աղբյուր է տարածաշրջանի համար։ Այս երկիրը մոտ 30 տարի ղեկավարել են ֆաշիստական գաղափարախոսության կրողները, նրանք այս երկիրը կերտել են իրենց կերպարով։ Ուստի ֆաշիզմը պետք է ոչնչացվի։ Այն կկործանի կամ Հայաստանի ղեկավարությունը, կամ մենք։ Մենք այլ ելք չունենք»,- ասել է Ալիևը:

Աննա Հայրիյան