Ճապոնիայի վարչապետը հայտարարել է՝ ուզում է Ռուսաստանի հետ խաղաղության պայմանագիր կնքել

Ճապոնիայի վարչապետ Շիգերու Իշիբան ևս մեկ անգամ հաստատել է, որ Տոկիոն հավատարիմ է մնում «տարածքային խնդրի լուծմանը» և Ռուսաստանի հետ խաղաղության պայմանագրի կնքմանը` չնայած երկկողմ հարաբերություններում առկա դժվարություններին։ Այդ մասին կառավարության ղեկավարը հայտարարել է խորհրդարանում քաղաքական իր ելույթում։

«Ճապոնառուսական հարաբերությունները գտնվում են ծանր վիճակում, բայց մեր երկիրը կշարունակի իր ուղին տարածքային հարցի լուծման և խաղաղության պայմանագրի կնքման ուղղությամբ»,- կրկնել է Իշիբան այն ձևակերպումը, որը նա արդեն երկու անգամ հնչեցրել էր խորհրդարանին նախորդած ելույթներում։ 

Մոսկվան և Տոկիոն բանակցություններ են վարում անցյալ դարի կեսերից՝ Երկրորդ համաշխարհային պատերազմից հետո խաղաղության համաձայնագրի մշակման նպատակով։ Դրա հիմնական խոչընդոտը մնում է Կուրիլյան կղզիների հարավային մասի նկատմամբ իրավունքների շուրջ տարաձայնությունները։ Պատերազմից հետո ամբողջ արշիպելագը ընդգրկվեց Խորհրդային Միության կազմում, սակայն Ճապոնիան վիճարկում է Իտուրուպի, Կունաշիրի, Շիկոտանի և մի խումբ փոքր անմարդաբնակ կղզիների սեփականությունը։ Ռուսաստանի արտաքին գործերի նախարարությունը բազմիցս ընդգծել է, որ այդ տարածքների նկատմամբ Ռուսաստանի ինքնիշխանությունը, որն ունի համապատասխան միջազգային իրավական հիմք, կասկածի ենթակա չէ։