Արագածոտնի մարզպետի նախագահությամբ տեղի ունեցավ մարզխորհրդի առաջին նիստը

 

Արագածոտնի մարզպետ Սերգեյ Մովսիսյանի նախագահությամբ, օրակարգային 8 հիմնական հարցերի քննարկմամբ այսօր տեղի ունեցավ մարզխորհրդի՝ 2025 թ․ առաջին նիստը։

Ողջունելով Արագածոտնի մարզխորհրդի անդամներին և գործընկերներին՝ մարզպետը նախ ներկայացրեց ԱԱԾ Արագածոտնի մարզային վարչության պետ, գնդապետ Ռաֆիկ Բոխյանին և նրան արդյունավետ աշխատանք մաղթեց։

 

Օրակարգում ներառված առաջին 2 հարցերի շրջանակում զեկուցեց Արագածոտնի մարզպետի աշխատակազմի ֆինանսական վարչության պետ Նորայր Գալստյանը։ Մասնավորապես, «Մարզի համայնքների 2024թ. սեփական եկամուտների կատարման վերաբերյալ» և «2025թ. համայնքների բյուջեների կազմման գործընթացի վերաբերյալ» հարցերին անդրադարձում ֆինանսական վարչության պետը նախ ամփոփեց նախորդ տարում մարզի 8 համայնքների սեփական եկամուտների հավաքագրման պատկերը՝ ընդգծելով, որ ընդհանուր առմամբ ցուցանիշները գոհացնող են, խնդիր է արձանագրվել միայն Ծաղկահովիտ համայնքում, և այն լուծելու ուղղությամբ մարզպետի կողմից տրվել է համապատասխան հանձնարարական։

 

Բյուջեների կազմման գործընթացի վերաբերյալ զեկուցվեց, որ բոլոր 8 համայնքերը նախնական բյուջեները հաստատել են, ըստ որի, սեփական եկամուտների պլանային ցուցանիշները ավելացել են շուրջ 152 մլն դրամով։ Ֆինանսական վարչության պետն իր ելույթում ընդգծեց, որ համայնքներին տրամադրվող համահարթեցման դոտացիաները, 2025 թվականին՝ 2018 թվականի համեմատությամբ աճել են եռակի՝ 300 %-ով կամ շուրջ 5 մլրդ դրամով։

 

Հաջորդ 2 հարցերի շուրջ զեկուցողը քաղաքաշինության, հողաշինության և ենթակառուցվածքների կառավարման վարչության պետ Հակոբ Ստեփանյանն էր։

«Մարզի համայնքների տնտեսական և սոցիալական ենթակառուցվածքների զարգացմանն ուղղված սուբվենցիոն ծրագրերի ընթացքի և 2025 թվականի համար ներկայացված ծրագրերի վերաբերյալ ամփոփ տեղեկատվություն» թեման ներկայացնելիս վարչության պետը նշեց, որ 2024֊ին շարունակվել են 2022 թվականին մեկնարկած 2 ծրագիր ու 2023-ին մեկնարկած 3 ծրագիր և 2024-ի 16 հաստատված ծրագրերը։ Սույն ծրագրերի հիմնական մասն ավարտված է։ 2025 թվականին համայնքների կողմից ներկայացվել է 22 սուբվենցիոն հայտ, որից միջգերատեսչական հանձնաժողով է ներկայացվել 7 ամբողջական փաթեթ, 1 ծրագիր էլ մարզպետի աշխատակազմում քննարկման փուլում է։

 

Հակոբ Ստեփանյանը օրակարգային հաջորդ՝ «Մարզպետի աշխատակազմի պատվիրատվությամբ մարզում ՀՀ պետական բյուջեի միջոցներով իրականացվող ծրագրերի վերաբերյալ տեղեկատվություն» հարցի վերաբերյալ զեկուցեց, որ մարզում մեկնարկել են 2 խոշոր ծրագրեր։ 1-ինը Շամիրամի ամբողջական գազաֆիկացման ծրագիրն է, որով նախատեսվում են իրականացնել 330 մլն դրամի աշխատանքներ՝ կառուցելով 15,852 կմ ընդհանուր երկարությամբ գազատար։ 2-րդ ծրագիրը Կաքավաձոր-Օթևան 1,3 կմ երկարությամբ ճանապարհի հիմնանորոգումն է, որի արժեքը կազմում է 183 մլն դրամ։ Նշված 2 ծրագրերի մասով որոշակի աշխատանքներ արվել են, դրանց ընթացքի մասին մանրամասն զեկուցվեց։

 

Զեկուցողը հավելեց, որ մարզպետի աշխատակազմի պատվիրատվությամբ 2024-ին մեկնարկել են տեղական նշանակության ճանապարհների գծանշման և կահավորման աշխատանքներ, նախատեսվում է նաև այդպիսիք իրականացնել 2025-ին։

 

Նիստը շարունակվեց «Մարզում 2024 թ. գյուղատնտեսության ոլորտում բերքատվության վերաբերյալ» թեմայով, որի շուրջ ելույթ ունեցավ գյուղատնտեսության և շրջակա միջավայրի պահպանության վարչության պետ Յուրա Ազատյանը։ Զեկուցվեց, որ գյուղմթերքի արտադրության ցուցանիշներն ընդհանուր առմամբ բարձր են եղել։ Նշվեց, որ պետական աջակցության ծրագրերի իրականացման պարագայում մարզի ֆերմերային տնտեսությունները շեշտակի կընդլայնվեն, ընդգծվեց գյուղացիների կողմից ցուցաբերվող հետաքրքրությունը պետաջակցության ծրագրերի նկատմամբ։

 

Հաջորդիվ, «Մարզի համայնքների աշխատակազմերի և համայնքային կազմակերպությունների հաշվեկշիռներում առկա մարդատար ավտոմեքենաների կրճատման վերաբերյալ» զեկուցեց ՏԿ և ՏԻՀ վարչության պետ Հովհաննես Ասատրյանը։ Նշվեց, որ ՀՀ Վարչապետի հանձնարարականով համայնքների մարդատար մեքենաների թիվը կրճատվել է, մասնավորապես, բոլոր համայնքների ծառայողական մարդատար 39 մեքենաներից կրճատվել են 30-ը, մնացել են 9։

 

Օրակարգում ներառված վերջին 2 հիմնական հարցերի շուրջ զեկուցումներ ներկայացրեց մարզպետի խորհրդական Արմեն Գրիգորյանը։

《Մարզում իրականացվող դպրոցաշինական ծրագրերի մասին》 թեմայով զեկուցումը ներկայացնելիս խորհրդականն անդրադարձավ Արագածոտնի մարզում կառուցվող և վերակառուցվող դպրոցներին, մասնավորապես նշելով, որ 26 դպրոցներից 1-ի կառուցումն ավարտվել է, 21-ը կառուցման փուլում են, 1-ում շուտով կսկսվեն շինաշխատանքները, իսկ 3 դպրոցներում դեռևս մրցույթներ չեն հայտարարվել։

Նա հավելեց, որ ավարտվել են ԿԳՄՍ նախարարության ԾԻԳ-ի և Արագածոտնի մարզպետի աշխատակազմի համագործակցությամբ մարզի 44 դպրոցների լաբորատորիաների սենյակների նորոգման՝ շուրջ 96 մլն դրամ արժողությամբ աշխատանքները։ Ընդհանուր առմամբ, մարզի դպրոցներում հիմնվել են բնագիտական առարկաների 61 լաբորատորիաներ, և ներկայում ընթանում են լաբորատորիաների գործարկմանն ուղղված աշխատանքները։

 

2-րդ հարցի՝ «2024 թվականի սուբվենցիոն ծրագրերի մշտադիտարկման խմբի կատարած աշխատանքների արդյունքների վերաբերյալ》 Արմեն Գրիգորյանը նշեց, որ հանձնաժողովի անդամների կողմից 2024 թվականին նշված ծրագրերը դիտարկելու նպատակով իրականացվել է 341 այց, որոնց արդյունքում բոլոր արձանագրված խնդիրների վերաբերյալ մեր համայնքների գործընկերներն իրազեկվել են՝ խնդիրների շտկման նպատակով։

Այլ հարցերի շրջանակում մարզպետի առաջարկությամբ քննարկվեցին եզդիական Շամիրամ համայնքի հիմնական դպրոցի և դեպի համայնք գնացող 600 մետր ճանապարհի բարեկարգմանը վերաբերող հարցեր։

 

Ամփոփելով նիստը՝ մարզպետ Սերգեյ Մովսիսյանը կոչ արեց համագործակցային աշխատանքի՝ համոզմունք հայտնելով, որ ջանքերի մեկտեղմամբ աշխատանքի ցուցանիշներն առավել բարձր են լինում։